Shillong, Lber 10: Mynta ka sngi ka tnad ialehkai ka jylla lyngba u myntri ba dei peit ia ka tnad ialehkai u bah Shakliar Warjri la pynkup burom ia ki rangialehkai kynjat ball kiba la poi phainal jong ka 76th National Football Championship Hero Santosh Trophy ha madan King Fahd International Stadium in Riyadh.
Kane ka long ka sien kaba nyngkong ia ka jylla Meghalaya ba kan poi sha ka phainal jong katei ka jingialehkai kynjat ball. Na ka liang jong u myntri rangbah ka jylla u Conrad K Sangma ruh u la phah ia ka jingai khublei ia kane ka kynhun ialehkai ka jylla.
Ha kane ka jingialehkai ka jylla Meghalaya kala shah rem ha ka Karnataka da shikol, ki rangialehkai ka jylla Karnataka kala ioh ban thep lai kol bad ki rangialehkai ka jylla Meghalaya kala ioh ban the par kol, hakaba la ioh ban rah ia ka kop rupa.
Kane ka long ka sien kaba nyngkong ba ia kane ka jngialehkai la pynlong sha bar jong ka Ri India ha dien ba ka All India Football Federation (AIFF) bad ka Saudi Arabia Football Federation kila ia soi ia ka soskular hapdeng kine ki ar tylli ki kynhun ialehkai kynjat ball.
Kum ka jingburom ia ki ka tnad ialehkai kala pynlong ia ka jingiaid paidbah kaba la sdang na Madan Heh ha Mawlai bad pynkut sha madan Iewrynhep ha kaba la pynkup burom ia ki, ka jingiaid paidbah la pynlong ia ka jingiaid lyngba na Jaiaw Jingthangbriew, Jaiaw St Joseph, Jaiaw Langsning, Jaiaw Pdeng, Mawkhar Main Road, Motphran, Police Bazar, AG’s Office, Additional Secretariat, Barik, Malki Point, Dhanketi, Don Bosco Square, Laitumkhrah Beat House.
Ha kane ka jingpynkup burom ia ki la synranlang da ki nongshong bike kumba 50 tylli ei ei ban burom ia ki rangialehkai ka jylla la don ka jingrwai pyndon burom na ki kaitor ba paw ka jylla, ha ka jingiadon lang u myntri ka tnad ialehkai u bah Shakliar Warjri, u President ka MFA bah Larsing Ming. Ha kane ka sngi la ai burom ruh ryngkat ka pisa katkum ka rule bala buh da ka tnad ialehkai.
