Shillong, Nailar 09: I samla Balarihun Kharlukhi na ka Shnong Mylliem Kyndong iba la wan sha khmat bad bat ruh ia ka kyrdan ba 6 ha ka result jong ka eksam Secondary School Leaving Certificate (SSLC), 2020 i la ïoh pdiang da ka laptop na u MLA ka Mylliem Constituency, Bah Hamletson Dohling uba dei ruh u Myntri ka tnad Urban Affairs ka Sorkar Jylla.
Kumba ju leh man u snem naduh u snem 2012, u Bah Hamletson Dohling kum ban pynshlur ia ki khun samla ka Constituency u ju thong ia ki ba lada ki lah ban leh bha bad poi ha ki kyrdan ba sha khmat ha ka eksam SSLC ( ha ka Top 20) un ai da ka laptop. Kumta mynta u snem ruh ia kane ka thong la ïoh rah da ine i samla pule na ka Ram Krishna Higher Secondary School, Mylliem.
Ia kane ka jingialang pynkup burom ia i Samla Barihun Kharlukhi lem kiwei pat 11 ngut ki samla pule na ka Shnong kiba la poi sha khmat ha ki eksam SSLC bad HSSLC la pynlong ha Mylliem Kyndong da ka Kyndong Nongkyntir Welfare Organisation (KNWO).
Kum ban shu kdew ba ine samla Barihun Kharlukhi i la ïathuh ba i la trei shitom baroh shisnem ban ïoh ban kheit ïa une u soh jong ka jingkmen. Kumta i la khmih lynti ruh ba kan pass bha ïa kane ka exsam matric namar ka jingtrei shitom bad ka jingminot jong i.
Ha kawei pat ka liang ka long kaei kaei kaba sngewsih namar ba ine i khynnah i wan na ka ïing ka ba duk. Ha ka jingkren jong ka kmie bad u kpa kila pynpaw ka jingsngew sarong shibun ïa ka jingpass bha jong ka khun jong ki ïa kane ka exsam SSLC.
Ha kawei pat ka liang ki sngewsih namar ba ki duk ha ïing bad kim lah ban phah pule ïa i ha ki skul lane ki kolej kiba khambha. Haba kren, u kpa jong ine khynnah u la ïam rangbah namar ba ym lah ban phah pule ïa i ha ki skul kiba khambha namar ba ki duk ha ïing.
I samla Balarihun Kharlukhi jong ka Ram Krishna Mission Secondary School, Mylliem ila ïoh 552 mark na ka 600 marks. I samla Balarihun ila ong ba ka jingduk lane ka jingleit pule ha ki skul Nongkyndong kam lah satia ban khanglad ïa kino kino ki samla kiba don ïa ka thong ban trei shitom ne ban paw sha khmat.
U Bah Hamletson Dohling haba ai jingkren u l ong, “Nga dap da ka jing sngew sarong ia I samla Balarihun Kharlukhi iba la wanrah nam bad burom ia ka iing ka sem, ka shnong, ka constituency bad kumjuh ruh ia ka Jaidbynriew baroh kawei”.
“Nga ai Khublei kyrpang ia baroh ki samla pule ka constituency kiba la pass bha ha ki kyrdan bapher bapher. Nga kitbok kitrwiang ba kin nang iai kiew ha ki kyrdan jingpule jong phi”, u la ong. U la kyntu ia ki ba kin long kiba minot ha ki jingpule khlem da klet ban long kiba don akor ka burom.
Kiwei pat kiba la ia donlang ha kane ka jingialang ki kynthup ia u Rangbah Shnong, Secretary ka Shnong Mylliem Kyndong, u Myntri M Kharlukhi, u Bah Over Nongkhlaw, Adviser KNWO lem kiwei kiwei pat.
