Shillong, Nohprah 29: Ki Hynñiew ngut ki Juniors Kickboxer kiba la mih khmat hapoh ka lama jong ka Meghalaya State Kickboxing Association (MSKA) ki lah ioh ban khur ia Lai Tylli ki Takma Ksiar, Lai Tylli ki Takma Rupa bad kawei ka Takma Ranong ha ka WAKO India National Cadets bad Junior Championship 2021 kaba la pynlong ha Pune naduh ka 21″ – 25th Nohprah 2021 ba la pyniaid da ka Kickboxing Sports Association Maharashtra kaba dei ruh ka Shnat jong ka WAKO India Kickboxing Federation kaba la long dkhot ruh jong World Association of Kickboxing Organizations (WAKO) IF, Italy.
Kine ki Samla kiba la wanrah burom ia ka Jaitbynriew kiba la khur ruh ia ka Takma Ksiar ki long U Gareth Garfield Laloo, U Brockstar Papang bad U Teiboklang Marbaniang , ki Ba la ioh ban khur ia ka Takma Rupa pat ki kynthup ia ka Samla Calfari War Khyllew,U samla Bansahnamkyrpang Warkhyllew bad u Banpynksan Warshong. Katba u Shaiborlang L.Mawphlang u lah ioh ban khur ia ka Takma Rnong.
Ia kine ki Samla La Pdiang bad pynkup burom da ka KSU ha ka 29 Tarik U Nohprah 2021 hapoh Ophis Treikam Jong ka Seng da ka Jing ia don ryngkat lang u Samla Donald V Thabah General Secretary, Samla Shemphang L.Mawphlang Litigation Secretary, Samla Ostarnic Marbañiang Organising Secretary bad kiwei kiwei ruh de ki Dkhot jong ka Seng lem bad u Bah L.Warjri President jong ka Meghalaya State Kickboxing Association (MSKA) ryngkat lang bad ki kmie ki kpa jong kine ki Samla Ialehkai.
Haba ai Jingkren Burom ia kitei ki Hynñiew ngut Ki Samla Ka Ri u Samla Donald u la ong ba kane ka Jing ioh khur ia kine ki Takma kam dei eh ba phi wanrah burom tang ia lade shimet ne ia ka Iing ka Sem hynrei ia ka Jaitbynriew Khasi hi baroh kawei, u la bynrap ruh ba kum ka Seng ki Samla Pule kam shym la man thait ban trei na ka bynta ban kyntiew ruh de ia ka jingbha jingmiat jong ki Samla Ialehkai ka Ri Khasi. U la Pynpaw ia ka jingsngew nguh kaba shi katdei eh ia ka jingjop jongki wat hapdeng kiba bun ki jingeh hynrei ka jing trei shitom jongki ka la lah pat ban wanrah ia ka Nam ka burom.
Nalor jong u Samla Donald la ioh ruh ki jingkren ai Mynsiem na u Samla Shemphang L.Mawphlang Litigation Secretary , u Samla Ostarnic Marbañiang Organising Secretary kumjuh ruh ka jingkren na u Bah L.Warjri President jong ka Meghalaya State Kickboxing Association.
