Pynkup burom ka Mary Mount HS, Residential School, Mawtawar ïa u MLA Mawlai

PT SawkmieShillong, Jymmang 19: Kum ka dak jong ka jingkynmaw ieit bad burom halor ka jingjop u Bah Process T Sawkmie kum u MLA ka Mawlai constituency, ka Mary Mount Higher Secondary, Residential School, Mawlai Mawtawar, Shillong ka la pynkup burom ia u ha ka rukom kaba iphuh iphieng bha.

Kunba shu kdew ka Mary Mount HSS ha ka por ba u jop kum u MDC ha u snem 2014 ruh ki la pynkup burom ia u namar ka jingpynpaw jong u ia ka jingieit ia kane ka skul. Ki khynnah skul ki la pdiang burom ia u MLA da ki jingrwai basngewtynnat bad ka skul ka la pynkup burom da ka jain ryndia.

Ha ka jingkren jong  u Bah Process T Sawkmie u la pynpaw ba u dap da ka jingsngewnguh ia ka skul halor ki jingpynkhreh jong ka baroh.“Ngam shym la poi pyrkhat ba ngan shah pynkup burom biang sa shisien, nga dap da ka jingsngewnguh ba phi la pynkup burom ruh ia nga ha ka por ba nga dang jop kum u MDC jong phi,” ong u Bah Sawkmie bad u la bynrap, “Da ka jingleh isynei jong u U Blei nga la jop bad mynta ka dei ka kabu ia nga bangan ioh ban shakri bha ia ka Mawlai bad ia ka jylla hi ruh baroh kawei.”

U la pynpaw ruh ia ka jingkmen halor ka thong bad ka jingangnud ba ka skul Mary mount ka don, kata ban kyntiew ia ka jingnang jingstad bad ia ka kyrdan jong ka skul na kawei ka kyrdan sha kawei pat.U la pynpaw ruh ia ka jingiakmen lang halor ka jingioh jong ka skul ia ka jaka mane ne ka chapel ba thymmai kaba ki dang shu dep pynheh.

U Bah Porcess u la kyntu kynpham ia ki khynnah skul kiba don ha kane ka sngi ba kin long kiba tip sngi, khnang ba kin kiew ha ka jingnang jingstad jong ki, namar lada dakaid kin ym kiew daleilei.Katba na ka liang ka Principal ka Miss Stella Phyllei, haba ai khublei ka la pynpaw ba ka shlei da ka jingsngewnguh halor ki kam nohsynniang jong u MLA haba ia dei bad ka skul.

“Kumba nga ju iakren bad ki nonghikai, phi long shisha i nongiohi jngai, iba ju nohsynniang barabor ia ka skul, wat la phim long i dkhot ka committee, hynrei phi la nohsynniang shibun bah bad ngim lah shuh ban siewkylliang ia phi,” ong ka Principal bad ka la bynrap halor ka work order ba u la ai sha ka skul, kaba kot sha ka T.36,000, “Haba phi wan wansha skul jong ngi ruh phim ju wan thylli, watla phi ong barit, hynrei bad ngi im dei ibarit, khublei shibun bah.” U MLA Mawlai u la ai ia ka work order ba T. 36, 000 ha ka kti jong ka Principal.

What Next?

Recent Articles

Leave a Reply

Submit Comment

*

Where to buy Vidalista Professional 20 Mg (Tadalafil) tablet