Shillong, Nailur 23: Ka Mawsynram Constituency Welfare Organization Shillong (MCWOS) mynta ka sngi kala pynkup burom ia ki 69 ngut ki samla pule naduh ka Matrik haduh ki kyrdan pule kiba sha jrong ia kiba la la ioh mark palat ia ka 60% shaneng ha ki eksam.
Ha kane ka jingpynkup burom ia kine ki samla pule da katei ka seng, ki samla kiba la poi sha katei ka thong kumba la buh da ka seng kilapoi sha ka 69 ngut baroh kawei ka Mawsynram Constituency. Ha kane ka sngi ia ki khun ki kti la wan ban synranlang da ki kmie ki kpa jong ki khynnah bala shah pynkup burom.
Ha ka jingkren jong u Bah HM Shangpliang IAS, u ba dei u Secretary ka tnad ka koit ka khiah jong ka jylla u ba dei ruh u trai shnong na ka Mawsynram Constituency, u la ong ba ka jingduk kam dei ban long ka jingkhanglad ban kiew ha ka jingpule. U la ong ba mynta ki don bun ki lad ki lynti ha kaba ki bank ki ai ia ka ram pule na ka bynta ki khynnah.
U la kyntu ia ki samla pule kiba la shah pynkup burom mynta ka sngi ba kin minot ha ka jingpule ka jong ki bad kaba kongsan ki dei ban don ia ka thong ha ka jingim bad haba la don ka thong ia beh sha kata ka thong ban poi sha ka jingjop. U la ong ba ka jinglah ka jong ki ba kin poi sha ka jingjop kumba ka long mynta ka dei ka jingtrei shitom ka jong ki.
Ha kajuh ka por, u Bah Shangpliang u la kyntu ia ki ba kin kiar na ki jingpynshoi, jong ka Mobile, Social Media bad ka jingiabeh rong phong ia kaba la tip kum ka Culture Scock. Kid ei ban kynmaw ba ki kmie ki kpa ki ialeh katba lah ban pynbiang ia ki khun ha ka jingpule katkum ka jinglah ka jong ki.
Ki riew rangbah kiba la ia don lang ban ai jingkren kyntu kynpham ia ki samla kiba la shah pynkup burom mynta ka sngi ki long, u Bah Jai Skhemlon Sirdar jong ka Madon, u Bah K Lyngkhoi, u Bah BS Nongrem u ba la kren na ka liang jong ki kmie ki kpa jong ki khynnah. Baroh kine ki nongkren kila kyntu ba ban poi sha ka thong dei tang ka jingtrei shitom.
Kiwei kiba la kren ki long u Bah Kynsai Thongi Joint Secretary jong ka MCWOS, Bah AS Katrai Chairman jong ka seng, ia ka jingialang la pyniaid da u Bah Section Syiemlieh General Secretary jong ka seng. La pynphuh pynphing ia kane ka sngi da ki jingrwai bad ki tem na ki riew paw khmat ha ka liang ka siaw ka rwai.
