Shillong, Lber 25: Ka Mawsynram Constituency Welfare Organisation, Shillong kaba dei ka kynhun jong ki paidbah kiba shong basah ha ka nongbah Shillong kiba dei na Mawsynram Constituency ha ka sngi Saitjain ki la ioh ban pynkup burom ia u Bah HM Shangpliang uba dei u MLA ba thymmai jong ka Mawsynram constituency.
Ia kane ka jingpynbup burom la pynlong ha Community Hall, Mission Compound, Shillong ha ryngkat ka jingia don lang kiba ha iing ha sem jong u MLA ba thymmai ka Mawsynram u Bah HM Shangpliang bad kumjuh ruh ki khun ki kti.
Ha katei ka sngi la pyniaid ia ka jingialang da u bah Donbok Wanniang bad la ioh ia ka jingkren da u bah Section Syiemlieh, secretary, bah Arjune Katrai kum u Chairman, Bah HM Shangpliang (MLA) bad la pynshongshit ruh da ka jingrwai bapher bapher.
Ia kane ka jingpynkup burom la shimti da u Chairman jong ka seng bah Arjune Katrai ban pynkup da ka jain ryndia, u kpieng bad u syntiew ryngkat ka jingsakhi palat 400 ngut ki paidbah.
Haba ai jingkren ha kane ka sngi u bah HM Shangpliang u la kular ban sa ai jingiarap da ka Ambulance ia kane ka seng ba kan iarap ia ki nong Mawsynram constituency lada don ki nongpang kiba kyrkieh khamtam ki bun ki shnong ha kane ka constituency ki long kiba jngai na Shillong haba ki wan thiah pang ha Shillong.
U la ong kum u nongmihkhmat uba dang shu shimti dang shi bnai duna u la ioh ban iakren ia ka jingeh jong ki paidbah ka constituency hapoh iingdorbar thawain da kaba wanrah ia ka jingkylli ban pan jingshai na ka sorkar halor ka jingsahkut ka surok sha Tyngnger, Synnei lyngba ka skhim jong ka Lafarge, ka jingsahkut ki 17 tylli ki project sam um ha Mawsynram constituency kiba la kot palat 20 klur.
U la ong kumba u la kular ha ka por ilekshon u la dep wanrah ruh ka jingiakren bad ka sorkar ka dei ban pynkylla noh ia u synsar bad sla tyrpad kum u mar rep na u markhlaw kaba ki thain riwar ki imja na kine ki jingthung.
U kyrmen ba kum u nongmihkhmat un dang buddien ia ki skhim pynroi ha man ki shnong kithaw bad un dang trei shitom kumno ban plie ka lad ia ki khun samla ban ioh kam ioh jam.
Kumban shu pynkynmaw ia kane ka MCWOS la seng ha ka 6 tarik Iaiong 2017 bad mynta kane ka seng kan kynjoh shi snem kynthih.
Ha kane kajuh hi ka sngi ki paidbah jong ka thain Dangar ha ka por janmiet kila pdiang burom ia u MLA ba thymmai jong ka Mawsynram Constituency bad kila pynlong ruh ia ka jingialang kaba iphuh iphieng bha ban pynkup burom ia u Bah Himalaya Shangpliang ha ka jingsakhi lang da ki paidbah jong ka thain ba kynthup lang ruh ia kiwei kiwei de ki jait bynriew kiba don ha kane ka dong khappud.
