Shillong. Nailar 30: Ka myntri ba dei peit ia ka SAD, ka Demora Marak mynta ka sngi kala pynkup burom ia ki nongtrei sorkar hapoh Secretariat kiba poi biang por ha jingtrei na ka bynta jong u snem 2015-2016 baroh kiba la ioh ia kane ka khusnam ki don 38 ngut.
Ia kine ki nongtrei sorkar kiba la wan biang por la ai da ia ki da ka jingthoh kaba long ha ka dur jong ka certificate bad ka pisa. Kane ka jingai khusnam ia kine ki nongtrei ka long ban pynshlur ia kiwei ruh ba kin poi biang por sha jingtrei. Ia kane ka jingshim jingkhien ka long katkum “Access Control System” kaba la buh ha secretariat.
Ia kane ka jingialang la pyniaid da u bah Hector Marwein Additional Chief Secretary ba dei peit ia ka Secretariat Administration Department, ha kane ka sngi la don lang ruh ka kong R.V Suchiang, IAS, Principal Secretary Personnel & AR, u Bah F.R Kharkongor, Commissioner & Secretary Sports & Youth Affairs Department ruh u la ia don lang.
Ha ka jingkren lyngkot jong ka myntri ba dei peit ia ka SAD ka Debora Marak ka la ai ka jingiaroh ia kine ki nongtrei sorkar kiba la kit khia ia la ka jong ka kam jong ki ban poi sha jingtrei ha ka por ba biang kala kyntu ruh ia kiwei ba kin but ia kane ka nuksa jong kine ki nongtrei kiba la shah pynkup burom mynta ka sngi.
