Pynkup burom ka Tia Chaphrang HS School, Sohkymphor ia ki khynnah ba pass SSLC- HSSLC

Sohkymphor, Jylliew, 24: Ka Skul Tia ChapSohkymphorhrang Higher Secondary School, Sohkymphor, East Jaintia Hills, mynhynnin ka sngi Saitjain, ka sngi ka la pynkup burom ia ki khynnah skul jong ka ha compound skul, kiba la pass ia ka SSLC bad HSSLC Examination 2018 ba la pynlong da ka MBOSE.

Haduh 35 ngut ki khynnah skul jong ka kiba la ia khun ia ka SSLC Examination mynta u snem bad kiba pass ki long 33 ngut, katba ha ka HSSLC (Arts) Examination pat, na ki 15 ngut baroh kiba la iakhun ia ka eksamin, kiba pass pat ki long 13 ngut. Kiba la wan First Division bad ruh ioh Distinction ha ki subject ba pher ba pher ha ka SSLC, ki don 6 ngut, ka Embokshisha Lartang, ka Minasi Lyngdoh, ka Ibanroi Lyngdoh, ka Iakidabiang Langstang, , ka Lusanias Lyndoh bad ka Bancyqueen Lyngdoh.

U Bah M H Dkhar, President jong ka AJYWO-Central Body baba ai jingkren ha kane ka sngi kum u Kongsan, u la iaroh ia U Ma Prostassius Suiam,  u khun swet, u bym don jingnang jingstad, hynrei namar kheiñ kordor ia ka jingnang jingstad bad  sngewkhia ia ka jingsahdien ka Jaidbynriew ha ka jingnang jingstad, khamtam da kaba phai khmat kyrpang sha kiba duk bad ki khun swet khun rangli, u la seng ia katei ka skul marwei ha u snem 2007 da ka jingthmu ban kyntiew bad pynroi ia ka jingnang jingstad ha ka thain sohkymphor bad kiwei de para Shnong ba marjan, khamtam eh na ka bynta ki khynnah kiba wan na ka longing kaba duk bad ki khunswet khun rangli.

U Bah M H Dkhar, u  la iaroh ruh shuh shuh ia ka jingbha mynsiem jong u Ma Protassius Suiam ban lum ia bun ngut ki khun swet bad ruh ri sumar bad pynleit skul ia ki ha katei ka skul jong u. U Bah Dkhar u la iaroh ruh ia ka kiew sted jong katei ka skul- tang hapoh 10 snem,  ka kymjoh sha ka kyrdan Higher Secondary bad ruh ki khynnah ki shait ia pass bha da ka jingtrei shitom bad aiti lut u Ma Protassius Suiam ia lade bad ki nonghikai  jong u.

Shuh shuh ha ka jingkren u Bah M H Dkhar, u la sneng kyntu ia ki khynnah skul  ban kheiñ kor ia ka jingnang jingstad ha kane ka pythei juk stad  ba mynta, ba ki dei ban trei shitom bad minot thop bad ban ym ailad ia ki jingeh ba har rukom ba ki iakynduh, khamtam ha ka duk ka kyrduh ba kan long ka daw jong ka jingpep skul jong ki na ka bynta ka lawei ba phyrnai jong ki bad jong ka Ri ba ka Jaibynriew,  da kaba ai nuksa ia shibun ki riewkhraw ha ka pyrthei naduh u PM Narendra Modi, u Dr. APJ Abdul Kalam, Dr. BR Ambedkar bad u Abraham Lincoln bad kiwei kiwei de ki bala wan na ka long iing kaba duk hynrei da ka jingtrei shitom jong ki, ki la kylla long ki khlur ba tyngshai ha ka pyrthei baroh kawei.

U Symbud kongsan, u Ma Kmenlang Lapasam, Waheh Shnong Sohkymphor Mission, ha ka jingkren jong u, u la ai ka jingiaroh ia u Ma Protasius Suiam namar ka burom bad jingkyrkhu kaba katei ka skul jong u, ka la wanrah ia ka shnong lyngba ka jingpass bha jong ki khynnah man la u snem. U la kyntu ruh ia khynnah ban iai trei shitom bad ruh ban nang iai bteng ia ki jingpule jong ki khang ba kin poi sha ka thong jong ka jingim jong ki.

Ha kane ka sngi la sam ia ki jingai sngewbha ia kitei ki khynnah ba la pass baroh da ki Momentos, Certificates, etc kum ka jingai mynsien ia ki ba kin iai nangtrei shitom bad iaid sha khmat ha ka jingpule jong ki. La pynphuh pynphieng ruh ia katei ka prokram da ki item ba pher ba pher nad ki khynnah skul jong ka skul naduh ka shat tynrai, ka jingrwai bad ka jingpyni riam tynrai ba la pynwandur hi ka Seralin Langstang, ka khynnah skul barim jong katei ka skul kaba dang bteng mynta ia ka jingpule jong ka ha ka Fashion & Designing ha Jowai Polytechnic.

Kiwei kiwei de kiba la ai jingkren ha kane ka sngi ki kynthup ia u ma Protasius Suiam, u trai skul, ka kong Waphasan Bareh, Principal, u Bah H. Deolangki  Dkhar, Secretary General ka AJYWO-Central body bad kiwei kiwei de. Ia katei ka jingialang la pyniaid da u Bah Reachingson Siangshai, dkhot ka Tia Chaphrang Educational Management Society.

What Next?

Recent Articles

Leave a Reply

Submit Comment

*