Shillong, Kyllalyngkot 04: Ha kane ka pateng bynriew mynta,ka jingstad u briew kala long sha ba palat liam bad imat ka la poi haduh kaba kut(climax) syndon.Shisien ba ka jingstad ka la poi haba kut(climax),nangne sha khmat pat,kan sa sdang sa ban hiar noh.Kan shim por da ki pateng briew(generations after generations) ba kan sdang biang ban kiew tangba da kawei pat ka dur(diffirent forms).
Kane ka juk mynta, ym dei shuh ban khein kai ne khein sting.La mih ki jingstad ki jait pa ki jait ha la ki jong ki jong ki tnad jingstad bapher bapher kiba ym don ba lah sngewthuh shuh pynban ban pynshong dor kano kaba dei bad kano pat kaba lait. Baroh ki pynksan beit tang ia la ki jong ki jong ki nia la jong.Kaba ong maki,kaba dei suda, hynrei, kaba ong pat kiwei,kaba lait bad kaba bakla suda.
Namar ba bun eh kiba la nang la stad mynta,ki mih pynban ruh bun ki jingbatai stad ban pynksan ia lade da lade la kum kita ki matlah Hindustan hyndai kiba la pynksan bad batai stad shaphang u hati.Shisien ba la sngew stad palat,barabor,ka ju poi pynban shaba lait ne shaba bakla pynban(overflow).
Tip shuh,shaei kane ka juk kan poi nangne shakhmat? Ha kane ka MLA eleshon 2023 ruh,imat,ym lah shuh ban batai ne khein jingkhein namar ki briew ki la stad bad sian palat mynta.Mynta,imat, la kham stad pynban u nongsngap ban ia u nongkren.Lada phah kren ia u nongkren,un kren pynban kat shaba lap ba shem.
Kan long pynban kaba ma ba ioh sngewlehrain bad sngew synei pynban ki nongsngap ia u nongkren bapli.Husiar! namarkata, haba phi phah kren paidbah mynta.Ha ka jingshisha,mynta ki por ym da donkam than ban ia kanbas elekshon k ha ki por mynshwa.
Katno eh ki paidbah kin sngap ia ka jingkanbas elekshon jong ki nongialam ki party bapher bapher haba ki jingtip bad jingpynsngewthuh ki la poi bad iohi hi ha man la ki khmat bad ki shkor jong uwei pa uwei ne kawei pa kawei ka briew lyngba kita ki lad pynphriang khubor paidbah (social media) lyngba ki mobile phone bad internet bapher bapher.
Lada bakla tiak,ka result eleshon 2023 ruh kan mih pynban sha bym poi pyrkhat.Ka bor bad ka jingstad bad ka mon u paidbah mynta ym lah satia ban shu khein sting ne khein kai.Ban pyni ba ki la stad shisha, ki briew jong kane ka juk, ki la dei shisha kein ban pynpaw pyrthei ban pynkylla khongpong noh syndon hadien ka MLA elekshon 2023.
Teng teng,ka jingstad palat ki briew mynta ka la pynlamwir pynban ia kane ka pyrthei.Ki kren bad leh kat ha la ka mon la jong khlem da pyrkhat shuh ia ka burom ka ijot jong kiwei pat.Tang ba la bit la biang ia lade,kata,la biang ka jingim bad jingmut jongki.
Ka jingstad palat ka la pynlong ia ki briew ba kin sngew heh sngew stad ia lade ban iaid bad leh katba ki kwah.Ki nang mut ba kaei kaba ki leh ne pyrkhat maki,ka biang beit,hynrei kam long satia kumta.
Kane ka lah ban wanrah pynban ka jingma ym tang ia ka iing ka sem jongki hynrei ia ka imlang sahlang baroh kawei bad khamtam eh ia ki hi shi met shi met.Kynmaw ba ka pyrthei bad ka juk hi ka iai kylla(dynamic) man la ka teng, kam dei satia ba ka iai neh hajuh.
Lada leh suk palat kum ki khun samla kane ka juk ruh,’ Don ka ma haba la than eh ka suk’.Lada ai mon ne ki ioh mon palat ruh,’Ki khun iohmon kim ju long ei ei’.Lada ki la nang la stad ruh,ym tang ba ki khein bein bad kim salia shuh ha iing ha sem bad ia kiwei de, hynrei ‘katba nangkiew ha ka kyrdan pule,katta, ka nanghiar pynban ha ka akor ka burom jongki’.
Ha kane ka juk, ‘kiba leh hok kin poi sha kyndong’,katba ‘kiba leh pap pat,baroh baroh kin burom bad pynkiew skong ia ki’.Ka pyrthei stad aiu kaba kum kane?Ka ri bad ka jaitbynriew jongngi ka la liat bad ngop pynban ha kum kane ka apot, ‘la shong ruh jhieh,la ieng ruh kynduh’.
