Shillong, Lber 24: U Bah Banteidor Lyngdoh MDC jong ka Mawkynrew Konstituency ha ka 23 tarik mynta u bnai u la khot ia ka jingialang ha Thangsning ha kaba da ki jajar ngut ki briew kila ia poi sha kane ka jingialang ha kaba u tei u MDC u la pynlait paidbah ia ka skhim MDC kaba lai klur tyngka kaba la ioh na ka KHADC.
Ia kane ka pisa lai klur tyngka la mang na ka bynta ban shna ia ki iing dorbar, ki iing skul ki lyngti shong bad kiwei kiwei ia ki jingtrei la sam paidbah ha katei ka sngi. Kine ki jingtrei kiba la sam ha kane ka sngi ka dei na ka Special Assistant Grant kaba ka KHADC kala ioh T.133 klur na ka sorkar pdeng ha kaba la pyntrei kam ha ki MDC constituency jong ki 29 ngut ki MDC hapoh jong ka KHADC ha kaba kila ia ioh mar lai klur tyngka.
Ki Nongkren ha ka jingïalang, kila pynpaw ïa ka jingkmen kaba khraw ba u MDC ula lah ban pyntreikam ïa ki skhim haba shit haba shai bad kila ong ba kane ka sngi kan dei ka sngi sah jingkynmaw ha ka khana pateng jong ka Mawkynrew Constituency ka bym pat ju pynlong ïa kum kine ki jingïalang mynno mynno ruh.
“Ka Clean Politics Campaign kala sdang na Nongkrem hynrei kaei kaba kham khuid-kaba shu ïalap ne ka jingsam ïa ki skhim haba shit haba shai bala sakhi da u paidbah” ong ki Nongshongshnong ka Mawkynrew Constituency kiba la shim ruh ïa ka rai ban trei borbah nangne shakhmat ha kaban kyntiew kyrdan noh ïa u MDC kum u MLA ban mih ïa sait ïa ki hapoh ka Ïing dorbar Thaw Aiñ ka Jylla.
U Bah Banteidor haba ai jingkren, ula ong “Naduh ba nga jop ïa ka elekshon MDC, nga la rung lut sha ki shnong ki Thaw jong ka Constituency bad nga la sakhi dala ki jong ki khmat ïa ki jingeh bad ki jingdonkam u paidbah. Nga la trei shitom ha i bor barit kum u MDC namar ngam lah ban shu peit ïa ki jingeh u paidbah” haba bynrap “Ka skhim T.3 klur ba sam mynta ka sngi ka dei tang ka jingsdang bad kum u Nongmihkhmat ngan nym shongthait ban trei na ka bynta ka bit ka biang u paidbah”.
Haba kyntu ïa ki Shnong ki Thaw ba kin iatreilang haba pyntreikam ïa kine ki skhim khlem ka jingkhohnïoh bad jingïakhñium, u MDC ula ong “Kane ka skhim ba ïoh mynta kam dei ka skhim shimet iano iano ruh hynrei ka dei na ka bynta ki kam pynroi ha ki shnong ki Thaw. Nga kyntu ïa ki Nongshongshnong ba kin iatreilang bad ka Shnong ka Thaw bad ki Nongpyntreikam ïa kine ki skhim khnang ba ki kam ki jam kin tyllun shakhmat bad ban lah pyndep janai ïa ka kam”
Ha kane ka sngi, u Bah Paidang ula buh ruh ka jingtyrwa hakhmat u paidbah na ka bynta ka elekshon MLA-2018 bad ula pan ïa ka jingkyrshan na u paidbah ryngkat jingkular da kaba ong “Lada nga shah jied kum u MLA ha u 2018, ngan nym aireng shuh ïa ka elekshon MDC-2019 namar nga sngewthuh ba ngan nym lah ban shakri ar kynrad”.
Kane ka jingïalang da kawei ka sur kala shim ruh ïa lai tylli ki rai ba kynthup ïa ka jingpyntrei hok ïa ki skhim bala dep sam, ban ai jingkheiñ ïa ka jinglong jingman bad ban trei borbah na ka bynta u MDC ha ka elekshon MLA. Kiwei pat kiba la ai jingkren ha kane ka sngi ki kynthup ïa u Bah Kolin Rongtong Sordar rim ka Nongjrong, u Bah Tyngkai S Mynsong Sordar Raid Rngi, Bah Andra Rynjah Sordar Laitkyrhong, Bah Traibor Nongkhlaw Sordar Thangsning, Bah Cresent Lyngdoh President ka Synjuk ki Nongsynshar Shnong ka Mawkynrew Constituency, Bah Seibor Warbah, Secretary Synjuk ki Nongsynshar Shnong ka Mawkynrew Constituency, Bah Daniel Suting ba na Jatah Lakadong bad kiwei kiwei. Ia ka jingialang ha katei ka sngi la pyniaid da u Bah D.L.Nongspung.
