Shillong, Nohprah 21: U myntri kam pynroi sor u Bah R. V. Lyngdoh mynta ka sngi u la pynlait paidbah ia ka skhim shna iing jong u myntri rangbah ka jylla ia kaba la tip kum ka “ Chief Minister’s Housing Assistance Programme” hapoh jong ka Myllime Block ia kane ka jingialang paidbah la pynlong ha Pomlum ha Naniun.
Haba kren ha kane ka jingialang paidbah u myntri kam pynroi sor u Bah Lyngdoh u la ong ba ka jingthmu jong kane ka skhim ka long ban ban pynioh ia ki tin sop iing sha ki long iing jong kane ka jylla kiba wan na ki long iing kiba duk ba rangli bad ban pynioh ia ka iing sah ha ki nongkyndong bad ki jaka sor.
Kum ka jingpynlait paidbah ia kane ka skhim jong ka sorkar jylla ia kaba la tip kum ka CMHAP la sam ia ki tin sop iing sha ki briew kiba hap hapoh jong ka Mylliem Block, kiba hap hapoh jong ka Mawlai bad Mawpat Block. Ha kane ka sngi u Bah AL Hek MLA ruh u la ia don lang.
Ha kane ka sngi la sam ruh ia ka pisa sha ki nongrep kum kabai seng na ka bynta ka kam ri Jingri kaba dei na ka Meghalaya Livestock Mission kaba dei lyngba jong ka tnad ri jingri jong ka sorkar jylla.
Ki heh sorkar kiba la ia don lang ki long ka N M Manpui Secretary kaba dei peit ia ka tnad shna iing, u DD Sangma Director ka tnad shna iing, Bah P T Passah BDO jong ka Mylliem Block.
