Shillong, Jylliew 06: Ka State Rural Employment Society (SRES), ka dei ka kynhun ba peit ban pyntrei kam ia ka skhim MGNREGA, PMAY-G, RGSA, CFP, kaba dei jong ka tnad pynroi nongkyndong bad kala pyntip ba ka sorkar kala pynlait ia ka pisa T.391 klur na ka bynta ban siew ia ka bai tiar baitar ha kane ka jingpyntrei kam aia ka MGNREGA.
Kane ka pisa kaba la pynlait mynta ka dei kaba dang sah jong u snem mang tyngka 2021-2022 ia kaba ym shym la lah ban pynlait ia kane ka pisa mynshuwa na ka daw kiba bun namar ba ki hap ban pynwan na kiba bun ki akkount sha kawei ka akkount ia kaba la tip kum ka State Nodal Account (SNA).
Ka jingwanrah sha kane kawei ka akkount ka long ban wanrah ia ka jingtrei kam kaba shai khlem kano kano ka jingbuhrieh ha kaba ia dei bad ka jingphah ia ka pisa tyngka bad ka pisa kaba ioh khatduh dei ha u bnai Lber 2022 kaba T.49 klur.
Ka jingioh ia kane ka pisa na ka sorkar pdeng ka dei ka jingshim khia jong u myntri rangbah ka jylla u bad u myntri ba dei peit ia ki kam pynroi nongkyndong bad u Principal Secretary kane ka tnad pynroi nongkyndong bad ka sorkar pdeng ha kaba la phah ia ka pisa bad ia kane ka pisa kaba la ion na ka sorkar pdeng un phah sha ki VEC mynta u bnai.
Haba ia dei bad ka jingsiew ia ka bai bylla sngi kam don kano kano ka jingwit namar la siew man la ka 15 sngi, hynrei ka jingslem dei tang ka jingsiew ha kaba ia dei bad ka bai tiar, ka jylla Meghalaya kala kham jam sha khmat ha kaba pyntrei kam ia ka MGNREGA namar lyngba kane kala shna ia ki jingtei bala pynioh myntoi ia ki paidbah sha ki nongkyndong.
Na ka liang ka sorkar jylla ka ai ka jingkhublei kyrpang ia ki VEC kiba la trei shitom ban pyntrei bha ia ka MGNREGA, ym tang ba kala ai kam ia ki paidbah hynrei kala wanrah shibun ki kam pynroiha ki shnong ki thaw bad ka jylla ka dei kawei na ki jylla ba pyntrei kam bha ia kane kane skhim jogn ka sorkar pdeng.
Ka MGNREGA kala buh ba dei ban pyntrei kam la kumno kumno 60% jong ka jingmang tyngka na ka bynta ban pynneh pynsah ia ki jingdon ka mariang man la u snem.
Da ka jingsdang ia kane ha kane ka snem mang tyngka kaba thymmai, ka phang kaba ha khmat eh ka long kumno ban pynneh pynsah ia ki um ki wah ban ia khun ban pynneh ia ka mariang bad la leh ia kane da ka jingiai bteng ban ia phylliew jingmut hapdeng ki paidbah bad ka sorkar.
