Shillong, Nohprah 06: Ki ophisar bad ki nongtrei jong ka iing dorbar thawain ka jylla mynta ka sngi kila pynlon ia ka “Food Festival” ha jan MLA Hostel Shillong bad ka jingthmu ka long ba ia ka jingmih yn ai jingiarap sha ka Missionaries Charity Shantinivas kaba don ha Nongpoh.
Ia kane ka Food Festival la plie da u Shongknor jong ka iing dorbar u Bah Metbah Lyngdoh, ha ka jingkren plie u la ong ba kane kam dei tang ka tamsa, hynrei ka don ia ka thong kaba kongsan bad kata ka long ban iarap ia kiba don ha ka jingeh ha ka jingim briew kiba don sha katei ka jaka sumar ha Nongpoh.
Ban ia don lang ha kum kane ka sngi kiba don kam ia ka jingiarap, u Bah Metbah u la ong “Dei ban ai nguh ia u blei u ba la pynlong ia ngi kumba ngi long mynta, pyrkhat ia kito kiba don ha katei ka jaka sumar kaba don ha Nongpoh, u la ong ba kaei kaba mih na kane ka jaka ym ai sha katei ka jaka sumar.
U Bah Himalaya Shangpliang MLA u la ong ba u sngew sarong ban ia don lang ha kane ka sngi namar ka jingthmu jong kane ka Food Festival ka long kaba kham kyrpang, namar kane ka Food Festival ka long na ka bynta ban iarap ia kito kiba sah ha Shantivan.
U Bah Shangpliang u la ong ba u da sngewhun shisha ba kum kane ka Food Festival kaba la pynlong namar kane kan leit sha kito ki briew kiba don kam ia ka jingiarap namar kine kiba shah sumar ha katei ka jaka ki long kiba la shah niew bein ha ka imlang sah lang.
Ha kane ka sngi la don lang ruh ka kong Ampareen Lyngdoh MLA bad u kurim jong ka u Joseph Fantin Lakdong MDC, ha kane ka sngi kiba la ia shim bynta ki long la jan baroh ki ophisar bad ki nongtrei ka Assembly bad kum juh ki MLA barim ruh kila ia don lang.
