Shillong, Jylliew 30: Ka Youth Hostel Associati
on of India (YHAI) Meghalaya State Branch ryngkat ka Dorbar shnong Umpling ha ka sngi Saitjain ki la pynlong ia ka prokram pynkhuid ia ka surok shnong naduh madan phutbol Mawarling, Umpling sha Itshyrwat haduh ka lad ban leit sha NEIGHRIM.
Ha kane ka prokram la shim bynta palat spah ngut kynthup ki paidbah ka shnong Umpling bad ki khynnah skul na ki lait tylli ki skul ka Hubert Memorial HS School, St. Rose SS School bad ka Rosebud SS School kiba hap hapoh ka shnong Umpling.
Haba kren ha ki nongthoh khubor u bah Nongsiang Chairman ka YHAI uba long ruh u Rangbah dong ka shnong Umpling ula ong, ka YHAI nalor kiwei ki prokram ba ju pynlong ha ka jylla kum ka trekking bad kiwei ki la pynlong ia kane prokram ban pynkhuid ia ka surok shnong ban lait na ki jaboh bad ki jingpang ba bun jait.
“Ka long ruh shi bynta ban ialap ia ki paidbah ban ieit bad sngewthuh ia ka jingkordor ka mariang ba kim dei ban bret jaboh ha shnong ne ha ki surok, namar ka pynjaboh ia ka mariang bad ka wanrah ki jait jingpang,” ong u Bah Nongsiang.
Ka jingkhuid ka sdang na la rympei, ong u bah Nongsiang bad kyntu ia ki paidbah ban leh khuid bad kim dei ban bret jaboh pathar ban pynjot ia ka mariang bad ka koit ka khiah.U Bah Nongsiang ula ong, na ka liang ka shnong la ioh bat katto katne ngut kiba bret jaboh bad dain kuna kum ka jingmaham ba kim dei ban mlien shuh ban leh ia kitei ki kam.“Lada ka shnong ka dang lap ia kiba leh pyrshah kan leh da kaba tyngeh bad ka lah ban ai sha ki bor ka ain,” ula bynrap.
Shwa ban pynkhuid la pynlong ia ka jingialang ba lyngkot ha madan phutbol ba la pyniaid da u Bah M Kharkongor bad la ioh jingkren na u Rangbah Shnong Umpling bah S Pyngrope, Secretary shnong bah B Jyrwa, bah ED Nongsiang Chairman YHAI- Meghalaya State Branch bad la donlang ruh u Bah AM Shadap, Bah LS Rapthap bad kiwei ki rangbah.
Haba kren ki la kyntu ia ki khynnah skul ban long kiba leh khuid naduh na iing ban pynlong ia ka shnong kaba khuid ba suba. “Ia ka Shilong la tip kum ka ‘Scotland of the East’ hynrei mynta ka la jaboh na ka jingleh sih u khun bynriew.”
