Shillong, Jymmang 11: Ban wanrah ia ka jingsngew jan hadpeng ki ar kynhun ki shipai iada khappud, ki BSF jong ka Ri India bad ki BGB jong ka Ri Bangladesh, mynta ka sngi la plie ia ka jingsam dawai ei kaba ar sngi ha shnong Umsyiem hapoh East kHasi hills ia kaba la plie ia kane ka jingai dawai da u sector commander jong ka BGB u Nasir bad na ka liang jong ka India la leh da u Dr A C Bhardwajan, DIG bad Medical Superintendent, BSF Composite Hospital Shillong.
Ia kane ka jingai dawai mynta ka sngi la leh ha ki bynta jong ki shong kiba dei hapoh jong ka Ri India bad la shai ka sngi pat yn ai dawai sha ki bynta jong ki shnong jong ka Bangladesh. La pynlong ia kane ka jingsam dawai ei ha ki shnong kahppud hapdeng jong kine ki ar tylli ki ri namar ba bun na ki paidbah nongshong shnong kiba sah ha khappud kim ioh ia ki lad jingsumar kiba biang.
Ha kane ka jingsam dawai mynta ka sngi ha ki shnong kiba hap hapoh jong ka Ri India ki paidbah kiba la ioh ia ki jingmyntoi na kane ka jingsam dawai ki long palat ia ka 300 ngut, naduh ki khunlung haduh ki tynmen ki kro. Ki paidbah kiba la wan ban shim dawai ki long na ka shnong Umsyiem, Khongwang, Umkrem, Pyrdwah kiba dei na East Khasi Hills District , ki shnong kum ka Dawki, Bakur ki dei na West Jaintia Hills Districts.
La shai ka sngi pat ia kane ka jingsam dawai yn pynlong ha Bangladesh naka bynta ban ai ia ki dawai na ka bynta ki paidbah nongshong shnong jong ka Bangladesh. Ha kane ka jingai dawai la shim kyrpang ruh ban sumar ia kiba don ia ka jingpang shini bad ha ka juh ka por la bethah ia ki ba kumno ban kiar ban lait na kane jingpang.
