Shillong, Iaiong 17: Ka Citizens Forum lyngba u Samla Banshai Marbaniang ha ryngkat da ka jingiatreilang bad ka HYC Mawsynram Circle da u Samla Morgan Lyngdoh, General Secretary, la pynlong ia ka jingthang mombati hapoh station Mawsynram mynnin ka sngi naduh kapor 5 baje janmiet da kaba pynpaw ia ka jingsngewlem bad ka jingdiaw mynsiem haduh katta katta ha kaba iadei bad ka jingjia kaba la wan hap hapoh ka longing jong ka Kong P. Marbaniang ka Kmie bad u Bah B. Kharbani u Kpa ha kaba u khun nyngkong u Banialam Marbaniang hapoh 6 snem ka rta u ba la shah rah bor ha ki riew thrang snam ki khwan myntoi bad ki riew shim kabu myn ha ka 23 tarik u bnai Nohprah jong u snem 2017 bad ban wan bret pat ia ka met ynda la pyniap kaba la lap ha ka 2 tarik mynta u bnai hapoh nala hajan station Mawsynram.
Ha kane ka sngi la ioh ban pynlong ia ka jingsngap jar kaba shi minit ha kaba baroh ki paidbah kiba la ialum lang hajan ban pynpaw ia ka jingsngewsih halor katei ka jingjia bad hadien kata la ioh ruh ban pynlong ia ka jingialang ba lyngkot hashuwa ban sdang ka jingthang mombati da kaba la pyniaid da u Samla Banshai Marbaniang nongialam jong ka Citizens Forum. Kum u nongialam u la pynpaw ia ka jingsngewsih bad sngewdiaw da kaba phai ia la kijong ki khmat sha u Blei Trai Kynrad Nongbuh Nongthaw ba un shim ia ka jingbishar kaba khraw ban pyni ia ki dak ki shin ban lap ksai ia ki riewshim kabu kiba la nud ban leh ia katei ka kam pap kam sang baroh.
Kum u nongpyniaid u la ai khublei kyrpang ia ki nongkyrshan ha katei ka sngi kumjuh ruh ia ki paidbah baroh napoh ka shnong Mawsynram lem bad ki para marjan naduh ki longkmie longkpa, ki riew rangbah ki samla lem haduh ki khyllung khynnah baroh kiba la wan ban iashimbynta da kaba pynpaw ia ka jingsngewlem bad ka jingdiaw mynsiem haduh katta katta ha kaba iadei bad ka jingjia kaba ymlah shuh ban klet kaba la pynjaw ia ki ummat kthang ia ki ba ha ing ha sem haduh ki paralok parajor ki para shnong bad ki para marjan baroh.
U Samla Banshai Marbaniang kum u nongialam paidbah u la pynrem jur ia ki nongleh dusmon bad ban dawa ruh na ki bor jong ka Aiñ ba kin pynsted ban lap ia ki jingshisha baroh ha katei ka jingjia halor ka jingshah pyniap u heprit Banialam Marbaniang.
La ioh ia ka jingkren lyngkot na u Samla Morgan, GS, HYC Mawsynram u ba la pynpaw iaka jingsngewlem halor katei ka jingjia bad ban ong ba lada dei ba lap ia kitei ki riew dusmon ym da donkam ban shu pyniap mardor hynrei kum ki riew paidbah baroh yn shu ia ksam tang mar khyndiat haduh ban da lut ka doh na ka met jong ki bad ban sah satang ka shyieng suda.
La ioh ruh ia ka jingkren lyngkot na u OC ka Mawsynram Police Station Bah O. Syiemlieh ha kaba nakaliang jong u ruh u la pynpaw ka jingsngew myllung haba phai sha katei ka jingjia ia une u khyllung. U la ong ruh ba ka jingduna palat ki nongtrei ha kiba bun ki bynta ka wanrah ia shibun ki jingeh hapoh ka Mawsynram Police Station lada kum kitei ki jingjia ki wan. U OC ka Mawsynram PS u la kyntu ruh ia ki bor synshar shnong lem bad ki paidbah baroh ban ai ia ka jingiatreilang bad ki bor jong ka aiñ ba kum kine ki jingjia kimdei shuh ban dang iai jia nangne sha khmat la kalong ha ka thaiñ Mawsynram ne sha kiwei kiwei ruh ki jaka jong ka Jylla. La plie ia ka jingthang Mombati da u Acting Chief ka Hima Mawsynram Bah Bording Marbaniang bad ter ter la ioh ban iashim bynta da baroh ki hajar ngut ki paidbah kiba lawan sha kane ka jingsngewlem.
