Pynlong ka KAS ia ka jingmir jigmut ha ka jingrakhe ia ka jingdap 175 snem ka ktien Khasi

Bah Titostarwell MLAShillong, Nailur 05: Kum shibynta ka jingrakhe ïa ka jingdap 175 snem thoh ka pule ha ka ktien Khasi, ka Khasi Authors’ Society ka la pynlong  ïa ka symposium halor ka phang “ka Thoh ka Pule ka sdang na u ABK” ha Nabon Sawian Memorial Secondary School, Mawmluh kawei na ki skul ba byngkong eh ha Ri Khasi ba la seng da u Rev.Thomas Jones-I ha ka snem 1842.  Ϊa ki lai tylli ki skul ba nyngkong eh ba la seng  da u Thomas Jones la tip mynta da ka Nabon Sawian Memorial Secondary School ha Mawmluh, ka Larsing Khongwir Memorial Secondary School ha Mawsmai bad ka Sohra Twa Presbyterian Upper Primary School ha  Sohra.

La pynïaid ïa ka symposium da u Dr.D.R.L.Nonglait, President KAS bad ka jingkren pdiang I Prof(Kong) S.Dkhar. La plie da ki kyntien kyrkhu kyrdoh u  Bah Tisosstarwell Chyne, MLA uba long u Kongsan jong katei ka sngi ryngkat, ka jingïadon lang ki Nongkitkam bad ki dkhot ka Khasi Authors’ Society, ki Nonghikai jong ki skul bad ka college ka thaiñ Sohra, ki dkhot Managing Committee jong kitei ki lai tylli ki skul u Thomas Jones, u Pastor bad ki Nongsharai ka Balang Presbyterian Mawmluh, u Sirdar ka Mawmluh, ki nongïalam jong ki seng treimon sngewbha jong katei ka thain lem bad ki paralok parajor.

U Bah Titos, ha ka jingkren jong u, u la pynpaw ka jingsngewbynniaw ïa ka jingpynduh noh ka MBOSE ïa ka Subject Khasi kum ka subject kaba dei ban pule da baroh ki khun Khasi “Compulsory subject”  ha ki class XI bad XII bad ailad ïa ki samla ban jied katba ki mon hi “optional subject/Elective subject”. U la bynrap da kaba ong ba kane ka jingleh jong ka MBOSE ka long ka dak jong ka jingma ïa ka ktien Khasi.

Haba phai sha ka jingïaleh ban pynïoh jaka ïa ka ktien Khasi ha ka Khyrnit kaba Phra jong ka Riti Synshar ka Ri India, une u Nongmihkhmat sha ka Dorbar Thawain ka Jylla u pynpaw ka jingsngewlyngngoh ïa ka jingpynslem jong ka Sorkar Jylla ban wanrah hapoh ka Ϊing Dorbar ïa ka Kaiphod jong ka Committee ba la thung kyrpang na ka bynta kane ka kam na ka bynta ban ai bor ïa ka Sorkar Jylla ban phah ïa ka kam sha ka Sorkar Kmie ha Delhi. Kumta u khmihlynti ba ka Sorkar jylla kan shimkhia bad leh noh kloi katba lah ban wanrah ïa kane ka kam ha ka ïing Dorbar bad u wer ïa ki para MLA ban ïa kyrshan lang ïa kane ka kam kaba kongsan jong  ka jaitbynriew.

Haba phai sha ka jingpyndonkam ïa ka SMS ha kine ki sngi, u Bah Titos u pynpaw ka jingsngewsyier ba ka rukom thoh Khasi kan sa pynbakla lut namarba ha ki SMS la shu ïa pynmlien ban thoh shiteng dak kum ‘fi’ ha ka jaka ‘phi’ bad kumta ter ter. Kum ka jingkitbok kitrwiang ïa ka Khasi Authors’ Society ha ka jingrakhe jong ka ïa ka jingdap 175 snem ka thoh ka pule ha ka ktien Khasi, u Kongsan u kyntu ïa ki paid Khasi baïar ban pule ïa ki kot Khasi khnang ban im thoh ka pule ha ka ktien Khasi.

Ha katei ka symposium la ïoh ka jingkren na ki ar ngut ki riew khraw pyrkhat ka thoh ka pule u Khasi, u Dr.B.R.Kharlukhi halor ka phang tnat “ Jingsdang u ABK ha ki skul Khasi” bad u Babu S.S.Majaw shaphang “Ka jingsan ka thoh ka pule ha ka ktien Khasi” kine baroh ar ngut ki dei ki President barim ka Khasi Authors’ Society.

U Babu B.R.Kharlukhi u pynshisha ba u khun Khasi um don la ki jong ki dak thoh. Haba phah kyrwoh ki ju pyndonkam da ki ksah shympriahkti. Kine ki dak kiba im, kiba la pyndonkam ha ka thoh ka pule ha ka ktien Khasi haduh mynta mynne ki long ki matti u Thomas Jones. U Thomas Jones u la sdang ban saiñdur ïa ki dak thoh Khasi da kaba pyndankam ïa u “ABC” kham hadien la pyndonkam noh da u ‘K’ ha ka jaka u ‘C’. Ynda la ih bha ka thoh ka pule, ki rangbah Khasi kiba kynthup ïa u Bah Jeebon Roy Mairom ki la wanrah sa u ‘ Ϊ ’ bad u ‘ Ñ ’ kum ki dak thoh Khasi.

Kum uwei na ki dkhot ka Committee ba la thung kyrpang da ka Sorkar Jylla na ka bynta ka jingïaleh ban pynrung ïa ka ktien Khasi ha ka Khyrnit kaba Phra jong ka Riti Synshar ka Ri India, une u rangbah u la pynpaw ka jingsngewlyngngoh ïa ka jingpynslem jong ka Sorkar ban phah ïa ka kam sha ka Sorkar India na ka bynta ban pynrung noh ïa ka ktien Khasi ha ka Khyrnit kaba Phra jong ka Riti Synshar ka Ri India.

Haba kren halor “Ka jingsan ka thoh ka pule ha ka ktien Khasi”  Babu S.S.Majaw u la ai ka jingbatai kaba bniah bad ai jinghun ïa ka lympung baroh kawei. Une u nonghikai bad ruh kum u nongthoh ba paw khmat jong kane ka juk, u la pynpaw ka jingkmen ba ka jingsdang jong u Alexander B.Lish jong ka Serampore Mission ban wanrah ïa ki dak Bengali kum ki dak thoh ha ka ktien Khasi ka la duh ka la dam noh. Watdano te ki khun  Khasi ki la dei ban pyndonkam ïa ki laiphew tam ki dak thoh Bengali ha ka thoh ka pule Khasi. U Babu S.S.Majaw, u la pynpaw ruh ïa ka jingsngewbynñiaw ïa ka jingslem palat ka Sorkar Jylla ban leit tied jingkhang ha Delhi ban ïoh rung ka ktien Khasi ha ka Khyrnit kaba Phra jong ka Riti Synshar ka Ri India.

Ka lyngpung ka la buh ruh ka jingkylli halor ka kyrteng jong ka Khasi Authors’ Society kaba long ha ka ktien English. Ki Nongïalam ka KAS kim lah khlem da kdew sha ki Nongseng jong ka ryngkat ka jingkular ban sa nang ïa kren ïa kane ka kam kaba la ju ïa kren teng hapoh ka Seng.

La pynrhem ïa katei ka lympung da ka jingrwai ba la ïa rwai lang ki khynnah skul jong  ka Nabon Sawian Memorial Secondary School, Mawmluh, ka Larsing Khongwir Memorial Secondary School, Mawsmai bad ka Sohra Twa Presbyterian Upper Primary School, Sohra. Ki kyntien jong ka jingrwai “PYNNEH LA KTIEN LA JONG, WAT NYM AI LAD ÏA KTIEN RONGPHONG” ki la pynhun jrut ïa ka dohnud ieit ri jong u Kongsan bad ki kynrem ki lyndan ka Khasi Authors’ Society. La pynwai ïa ka Symposium da ka jingkren ai khublei u Bah P.Kharshiing General Secretary, KAS u ba la pynpaw ka jingsngewnguh ïa baroh kiba la ai ka jingkyrshan ban pynlong ïa kane ka Symposium kaba jop.

 

 

 

What Next?

Recent Articles

Leave a Reply

Submit Comment
*