Shillong, Risaw 23: Mynta ka sngi ka skul bah Martin Luther Christian University kala pynlong ia ka “Convocation 14” da ka online ha kaba u Lat ka jylla u Satya Pal Malik uba dei u nongwan peit ia ka skul bah u la ai jingkren kum u kongsan.
U Rev Lyndan Syiem ha ka jingkren ka jong u la sha ki samla pule kiba lah pyndep ia ki jingpule jong ki. Ki samla pule kiba la lah ban pyndep ia kane ka jingpule ki don 711 ngut ki khynnah kiba la pyndep ia ki jingpule ha ki kyrdan bapher bapher.
Na kitei ki don 7 ngut kiba la pyndep ia ka jingpule ha ka PhD, 381 ngutki master’s, 278 ngut ki bachelor’s, 13 ngut ki post graduate diploma bad 32 ngut ki diploma mynta u snem ia kaba la pynkupburom ia ki mynta ka sngi.
U Lat ha ka jingkren jong u, u lah iaroh ia ka jingkiew kane ka skulbah ha kaba ka la ioh ia ka kyrdan bahynniew naki skul bah jong ki riewshimet bad ia kane la pynmih ha ka “Education World India Higher Education 2021-2022”.
U la kythoh ruh ba ka skulbah ka la leh ia kaba bha eh ha kaba ka la ai 100 tylli ki scholarship ia ki khynnah ba wan na ki long iing long sem ba shem shitom. Kane ka jingleh kan wan rah ia ka jingkyrmen ha kiba bun ki samla jong kane ka jylla.
U Lat u la ai ka jingiaroh ba u iohi shi bun ki kam ba ka skulbah ka pyntreikam khatam ba u iohi ruh ia ki nongpule ka skulbah kiba la dep pule ba kileh bha ha kikam ki jam, khamtam eh ha kaba ki la jop iaka Chief Minister’s E Championship Challenge 2020 bad PRIME Meghalaya CM Entrepreneurial Challenge 2020-21.
U Pastor Lyndan ha ka jingkren jong u, u lah kyntu ia ki nongpule ba kin pyndonkam ia ka jingpule na ka bynta ka kam ka jam bad ka ioh ka kot. U lah ong ba kidei ban ieng skhem hapdeng ki jingjia kiba jiasawdong jong ngi.
U lah ban ba ka jingbymioh kam ki khynnah pule ka long kaba khraw hynrei da shi bun ki nuksa u la ai mynsiem ia ki samla. U Pastor u la kyntu ia shi bun ki samla ban sdang ia la ki kam khnang ba ma kiruh, kin ioh ia ka lad ban ai kam ia kiwei ki samla ruh.
Kum uwei uba la iakynduh ia ka jingpang COVID19, u la ai mynsiem ia ki samla baroh ban nymnoh mynsiem, ban phai sha U Blei, ban iai bteng ban ialeh ia ki jingeh bad ban pyndon kam hok ia ki lad kiba don hakhmat.
