Wapung, Nohprah 19: Ka Seiñ Kur Dkhar Wapung Circle, ha kane ka 17 tarik mynta u bnai, ka la pynlong ia ka prokram pynkup burom ha ka shnong Wapungshnong , East Jaintia Hills.
Ki smala kiba la shah pynkup burom ki long 27 ngut ki samla pule kiba la pass bha ha ki kyrdan bad ki laiñ pule bapher bapher ha une u snem 2022, bad ruh ia ki katto katne ki dkhot jong ka kur kiba la leh bha ha kino kino ki kam ki kti ha ka jingim jong ki, kiba hap hapoh jong ka Seiñ Kur Dkhar Wapung Circle.
Ia kane ka jingpynkup burom ia ki samla pule bad ki dkhot jong ka kur Dkhar la leh khnang ban ai mynsiem bad ruh pynshlur ia ki bad ia kiwei ruh ba kin nang iai trei shitom bad leh bha ha ka pule ka puthi jong ki bad ruh ha kino kino ki kam ki kti ha kaba ma ki ki trei.
Ha ka juh ka por la thung bad pynskhem ruh ia ka tnad trei kam jong ka Seiñ Kur Dkhar ha kaba ha katei ka shnong hi, ha katei ka juh hi ka sngi, ia ka ba la tip kyrteng kum ka Seiñ Kur Dkhar, Wapung Shnong Unit.
Ha kane ka sngi la iadonlang bad ruh ioh ia ki jingkren na ki nongialam bapher bapher jong ka Seiñ Kur Dkhar, kiba kynthup naduh Seiñ Kur Dkhar Central Body, Seiñ Kur Dkhar East Jaintia Hills District, Seiñ Kur Dkhar West Jaintia Hills District bad ruh, na ki Circle bad ki Unit ba pher ba pher jong ka Seiñ Kur Dkhar hapoh ka Ri Jaiñtia.
