Shillong, Kyllalyngkot 24: Ka Khasi Jaintia Presbyterian Assembly ha kine ki sngi kala pynmih ia ka jingthoh ba kan long ka jingbethah ia ki paidbah ba kumno ban jied ia u nongmih khmat, u MLA ha kane ka elelction ka ban long ha ka 27 tarik Rumphang, Ia kane ka jingbethah jong ka balang Presbyterian la soi da u Rev N.S. Phawa senior administrative Secretary, Khasi Jaintia Presbyterian Assembly.
Ha kane ka kot kaba la pynmih ka jingthoh ka ong, Ka bha ka miat, ka roi ka par, ka shongsuk shongsaiñ, ha ki shnong ki thaw bad ha ka ri baroh kawei ka shnong shibun eh ha ki nongsynshar. Lada kum ki nongshnong shnong ha ka Ri la bakla ban jied ia ki nongmih khmat sha ki dorbar thawaiñ, yn nym lah ban khmih lynti ba ka Ri kan iaid sha pharang.
Ha ka jingthoh kaba la pynlait paidbah la thoh ba kum ka balang kam lah ban shu sngap jar ne shu khmih na jngai halor kane ka phang. Ha kane ka jingthoh la thoh ba “ Ngi im ha ka Ri kaba ka synshar khaddar kam dei kaba iai shah liang, kane ka mut ka Secular state, ka mut ba baroh ki jait niam ki long laitluid ha ka Ri Baroh kawei”. Kumta u wei pat kawei ka nongshong shnong ka don ka hok ban kren ban pynpaw ia la ka jong ka jingsngews. Ha kawei pat ka liang ka niam ka don ka bynta ban ia trei lang bad ka state ha kaba pynbha ia ka imlang sahlang bad ka akor long briew man briew.
Ha kane ka jingthoh, na ka liang jong ka KJPA ka thoh shai ba ba ka balang kum kawei pat ka kynhun, kaba ieng na ka bynta ka man-bha man-miat ki nongshong shnong, ka don ka bynta kaba khraw ban kit lyngkor lem bad ki bor synshar ban wanrah ia ka jingbha ban kyntiew ia ka imlang sahlang. Kumta ka balang ruh ka don ia ki kyntien ia kdew ia pyni ba kum kiba ngeit ia kiar na kaba sniew.
Ha man ka snem ba ka sorkar ka pynkhreh ia ka election, MDC, MLA bad MP, sha ki iing dorbar thawaiñ , ka long kaba biang eh ba ka balang kan ong ei ei halor kane ka phang ha kaba ia dei bad ka jingjied ia ki nongmihkhmat, ha kane ka kot lyngkdop, la thoh ba ka balang ka kren ia kaei kaei kaba khuid, kaba hok, kaba beit bad kaba don burom.
Halor kane ka bynta, na ka liang jong ka Khasi Jiantia Presbyterian Assembly la thoh ba ka sngew don kam ban buh katto katne ki jingkdew bad jingbethah. Ha kane ka sien kaba bynta ka KJPA kala buh phra tylli ki jingbethah kumno ban jied ia ki nongmihkhmat bad kita ki jingbeh ki long.
Ka jingjied nongmihkhmat ka dei ka kamram jong ki nongshong shnong kynthei bad shynrang ha ka Ri India kiba dap 18 snem shaneng ban long ki nongthep vote, bad kiwei ban pyndep hok ia kane.
Ban kynmaw ba ka Riti Synshar ka Ri India ka shah ban thep vote tang kawei ka vote, na ka bynta ia lade, ym ia ka kyrteng jong kiwei, kaba palat nangtang ka long beaiñ.
Kam long kaba dei ban thep vote ha ka kyrteng jong kiwei pat kum kiba la iap ne kiba pep ha kato ka sngi thep vote.
Ym dei ban shah pynngop ne shah pynbiej lano lano ruh ha ka pisa bad kiwei kiwei ki jingai ha u candidates ne na ki riew party.
U ne ka ki don ka don ka hok ban kyrshan ia uno uno lane kano kano ka candidate tang dei ban bishar bah ia ki candidate ne party kiba don ia ka nongrim kaba skhem ha ka rukom trei kam.
Ban kynmaw ba kum ki nongshong shnong haba ki pyniasoh ne long dkhot, sha kano kano ka party kim dei ban ia bein ia khoh kylliang ha ka por ialap election.
Na ka liang jong kas KJPA ka kyntu ia ki briew ban peit ia ki briew kumne, kiba la rangbah ha ka pyrkhat pyrdain, kiba ieit shisha ia ka Ri bad ka jaidbynriew,kiba don ka jingnang jingtip, ka jingstad bad ka bor shemphang kaba biang. Kiba skhem ha ka nongrim kaba bha. Kiba don ka jingim kaba bha bad ba khuid, kiba lait na ka jingbud nam ha ka kam pisa tyngka, ha ka bam ka dih ne ha ka shnongkha shnong man.
Namar ba ki long ki nongmih khmat sha ka dorbar thawaiñ, ki ban noh syniang sha ki kam thawaiñ ka ban wan rah ia ka suk ka sian bad ka roi ka par bad ka bha ka miat ha ka imlang sahlang, dei ban jied ia ki briew ba nang ban thawaiñ bad kiba kloi ban aiti ia lade na ka bynta ka Ri bad ka jaidbynriew.
Ka balang kam buh ha ka jingduwai na ka bynta ka election MLA sha ka dorbar thawaiñ, Legislative Assembly kaban long ha ka 27.02.2018.
