Shillong, Lber 13: Ki shipai BSF kum ka dak jong ka jingsngewsih halor ka jingkhlad noh jong ki 12 ngut ki pulit CRPF ha ka jingshah siat jong ki ha ki Naxals ha Sukma District jong ka jylla Chhattisgrah, mynta ka sngi kila sangeh ia ka jingleh kmen Holi.
Ha kane ka sngi ha ka jaka ba kin pynlong ia ka jingleh kmen kila pynlong ia ka jingduwai kaba kyrpang na ka bynta ki mynsiem kiba la khlad noh. U PK Dubey IG jong ka Meghalaya Frontier u la phah ia ka khubor sngewlem sha ki ba ha iing ha sem jong kito baroh kiba la khladnoh.
Ki kynhun shipai kum ka CISF ITBP bad ka SSB kine ruh kila pynpaw ia ka jingsngewsih kaba khraw bad kum ka dak jong ka jingsngewsih kthang ha kaba ia dei bad kane ka jingjia kine ki kynhunshipai ruh kila sangeh kane ka jingleh kmen Holi mynta ka sngi.
Hapoh kane ka nongbah Shillong kane ka jingleh kmen Holi kala iaid beit iaid ryntih ha kaba la iohi ba ki paidbah kiba leh kmen ia kane ka Holi kila ia tohrong iwei ia iwei kum ka dak jong ka jingiakhublei mar kylliang ban pdiang burom ia ka Pyrem.
