Shillong, Iaiong 13: u Bah Banshai Marbaniang uwei na ki nongshong shnong jong ka Shnong Mawsynram bad kumjuh kum u nongtreimon sngewbha u la pynpaw ba u la ngiah ban dawa na ka Sorkar ban kyntiew ia ka roi ka par hapoh ki thaiñ Mawsynram Block na kadaw ka jingleh klet ki bor Sorkar ha kiba bun ki liang.
Da ka jingsngew skhem ha kane ka Sorkar kaba thymmai bad kum uwei na ki nongtreimon sngewbha ha ryngkat da ka jingsynranlang u Samla Morgan Lyngdoh nongialam jong ka HYC Mawsynram dang shen hapdeng ki khyndiat sngi kiba la leit une u Samla u la iohlad ban iakynduh ia u Myntri Rangbah ba thymmai jong ka Sorkar Jylla u Conrad K Sangma ha kaba u la aiti ia ka dorkhas kaba la pynpaw ba ka Sorkar Jylla hapoh ka jingialam jong u ka la donkam kyrkieh ban kyntiew kyrdan ia ka Mawsynram C&RD Block sha ka kyrdan Civil Sub-Division.
Ha kane dorkhas kaba u la ai kala kdew shai ruh ia kiwei pat ki bynta kiba kongsan kaba kum ki paidbah jong ka thaiñ kidei ban ioh bad kaba donkam ka long ka jingdawa ban kyntiew kyrdan ruh ha kaba iadei bad ka Surok naduh Mawphlang shaduh Balat kaba la jot rathai katba dang mih ki sngi ki snem bad u la pynpaw ruh ba ki paidbah naduh ki thaiñ Lyngiong ter ter shaduh Mawsynram-Balat kumjuh ruh sha ki thain Lawbah haduh Ryngku ki dang iai shaniah ia katei ka surok kaba la rim tam kaba la shna naduh kipor jong ka Sorkar Phareng.
Dei tad ynda hadien ba ka Meghalaya ka la ioh la ka jong ka Jylla kaba pura la ioh ban siang rong ia kane ka Surok bad haduh kine ki sngi kiba mynta ka dang iai sah kumjuh shi kumjuh khlem da lah ban pynbha ia ka. U la ong ruh ba ka jingjot jong katei ka surok ka la ktah jur haduh katta katta ia ka ioh ka kot jong ki paidbah khamtam ha ki kam khaïi pateng kaba bun ki ju kit ju bah lyngba kane ka surok naduh Guwahati-Shillong haduh ki jaka ban pynpoi ia ki mar ki mata jong ki bad haba phai sha ki kam khaïi dewiong dei lyngba kane ka surok Mawphlang-Balat ba hap ban kit ia u dewiong naduh ki thaiñ Nongjri ter ter bad na kiwei kiwei ki jaka ban pynpoi ia u dewiong sha ka jaka badei ban pynhap bad kadei ka surok kaba dang tlot haduh katta katta kaba lah ban kit mar ymdei ban palat na ka 9 ton.
Une u Samla u la pynpaw ruh ha kaba iadei bad ka Surok Border India-Bangladesh kaba don kumba 41 Kms kaba ki paidbah ki donkam ha ki kam khaïi pateng da kaba don ki International Border Haat hapdeng ka India bad Bangladesh. Lada phai sha kiwei kiwei ki surok kiba ka sorkar ka la dep ban pynbha kum napoh Shillong-Sohra, Shillong- Mairang, Shillong-Nongstoin, Shillong-Nongpoh, Shillong-Jowai bad Shillong-Tura ki surok ki la bha lut ym donkam shuh ban dang ia dawa ban pynbha hynrei haba phai na Shillong-Mawsynram-Balat-Ryngku kumba 30000 tylli ne tam ki thliew kiba heh bad ba rit lah ban shem.
Ka jingdawa ban kyntiew kyrdan ia katei ka surok kam shym mut tang na bynta ban kham suk ha ka leit ka wan hynrei ka don ruh ia shibun kiei kiei kiba lah ban wanrah ia ka roi ka par lem bad ka ioh ka kot da kaba pyniasoh na kawei ka Ri sha kawei pat kumjuh ruh ka don ia ki jingmyntoi kiba lah ban khring ha kaba iadei bad ki kam jngohkai pyrthei bad haba phai shaki kam jngohkai pyrthei.
Ka Block Mawsynram ka don ia shibun ki jaka kiba itynnad nalor ka nam ba la ioh lyngba ka Guinness Book of World Records halor jingjur slap tam ha pyrthei baroh kawei kumjuh ruh dang shen ka la ioh sa kawei ka nam lyngba ka Krem Puri kaba don hapoh Laitsohum kaba la tip kum ka Krem Mawshyiap kaba jrong tam ha ka pyrthei World’s Longest Sandstone Cave dei na kane ka daw ba une u Samla u la dawa na ka sorkar ba kadei ban ithuh bad kyntiew ia ki kam jngohkai pyrthei sha katei ka thaiñ.
Haba iakren bad u Myntri Rangbah ka Sorkar Jylla u Conrad Sangma, u Samla Banshai u la pynpaw ba ka Sorkar Jylla ka ioh shibun ka khajna lyngba ka thaiñ Mawsynram naduh ka Khaïi pateng, u dewiong, mawshun bad kiwei kiwei bad khamtam eh kadon ruh ka Lafarge Limestone Mining Pvt. Ltd hapoh Nongtrai kaba dei ka Company pynmih dewbilat kaba heh bha ha kaba ka Sorkar Jylla ka ioh da ki klur tyngka ka khajna man la u snem.
Kane kadei ka sien kaba ar kaba na kaliang jong u kum u nongtreimon sngewbha napoh katei ka thain u la ai ti ia ka dorkhas sha ka Sorkar Jylla naduh ka sorkar kaba la leitnoh. Ym tang katta dang shen ha u snem uba la leit, u Samla Banshai Marbaniang u la phah ia ka dorkhas (Memorandum) sha u Myntri Rangbah duh jong ka Ri India u Narendra Modi lem bad sha u Nitin Gadkari u Myntri ba bat ia ka tnad Road Transport & Highway jong ka Sorkar India da kaba pynpaw ia shibun ki jingdonkam haba phai lyngba katei ka Surok Mawphlang – Balat Road.
Haba pynkut ia ka jingiakren u Samla Banshai bad u Samla Morgan kila pynpaw ha u Myntri Rangbah u Conrad k Sangma ba kadon ka jingkyrmen lyngba kane ka sorkar kaba mynta hapoh ka jingialam jong u ban phai khmat lem sha katei ka thaiñ Mawsynram na bynta ki kam pynroi kiba bun kiba kum ki paidbah ki donkam namar kumba la paw ha u snem uba la dep 2017 ka Sorkar Jylla hapoh ka jingialam u Dr Mukul Sangma kum u Myntri Rangbah ka la kyntiew kyrdan ia saw tylli ki block kum ka Mawshynrut, Pynursla, Chokpot bad ka Raksamgre Block bad kandei ruh ha kane ka sienjam kaba nakaliang jong ki kum ki nongtreimon sngewbha kin pynsngew sha ka sorkar bad lada kam shah shkor ne sngap ia ka jingud kum ki nongialam paidbah ynhap ban rah hakhmat u paidbah ban iatai bad kren ia ki jingshisha baroh.
