Pynrem jur ka AJYWO halor ka jingpyniap dusmon ki runar thrang snam ia ka Kong Fullness

Jowai, Iaiong, 5: Ka AJYWO Central Body ka pynpaw ia ka jingsngewsih kthang halor ka jingshim jubor jong ki runar thrang snam ia ka jingim jong ka Kong Fullness Lyngdoh ha ka sngi ba ar ba la dep ha Lad-Sutnga, Dkhiah East, East Jaintia Hills District bad ka Seng ka pynrem jur ruh haduh katta ia ki runar ba la rung da ka mynsiem ksuid ban shim jubor iaka jingim jong katei ka long kmie ba pli.

“Ka AJYWO ka pynpaw ia ka jingsngewsih jur halor ka jingjia ba sngewsih kthang bad ba shyrkhei halor ka  jingshim jyndat ki briew ba la kylla mrad-khlaw iaka jingim jong ka Kong Fullness Lyngdoh ba pli ha Lad-Sutnga, Dkhiah East, East Jaintia Hills, ha kane ka sngi ba ar ba la dep bad na ka liang jong ka Seng, ka pynrem jur haduh katta katta ia katei ka kam jong kitei ki mrad khlaw ki bym shym la map wat iaka jingim jong ki kynthei khynnah ba shibuit shibor ba duk ba suk bapli,” ong U Bah M H Dkhar President jong ka AJYWO Central Body.

“Halor ka jingshim jubor ba dang shen jong ki runar thrang snam ia ka jingim jong ka Kong Fullness Lyngdoh, bad ruh ia ka jingim jong u Poipynhun Majaw, President jong ka JYF,  ka AJYWO ka kyntu jur ia ki bor jong ka aiñ ba ki dei ban iaid shakhmat ban thwet jur haduh ban da lap ia baroh ki runar ki ba la don kti ha ka ban pyniap dusmon ia kitei baroh ar ngut bapli bad ruh ban pynshitom jur ia ki da kaba tyngeh  kat kum ka aiñ”, ong sa u Bah J.R Siangshai, Vice President jong ka AJYWO Central Body.

U Bah M H Dkhar u bynrap biang da ka ba ong “Ka seng ka pynpaw ia ka jingsngewkhia kaba jur halor ka jingnang kiew jong ki kam sniew ba shyrkhei kum jingshim jubor ia ka jingim jong ki para mynsiem ba kordor da dei ia u shynrang khatar bor,  kum ka jingpyniap dusmon ia u Poipynhun Majaw, President jong ka JYF ne ia ka kynthei shibor kum ia ka kong Fullness Lyngdoh ha ki briew ba la kylla mrad khlaw ia lade. Ka iaid ka ieng, ka shong ka sah jong kiba lui lui ha East Jaintia Hills, lada ha kane ka rukom long rukom man, kam shym la long shuh ka ba shngaiñ. Ka seng, na ka bynta ka jingshngaiñ ki paidbah jong ka District bad kiba wan donkam kiwei pat ki District ruh, ka kyntu jur, ia ki bor pulit jong ka East Jaintia Hills District ban trei bor bah da kaba tyngeh ban tem bad pynduh jait noh shisyndon ia kiba kum kine ki jaid jingsniew bad shyrkhei bad ruh iakiwei kiwei de ki kam sniew ha ka East Jaintia Hills District”.

“Ha ka jingiadei bad katei ka jingjia ha Lad-Sutnga, Dkhiah East, ka AJYWO ka phah ruh iaka khubor sngewlem sha ki ba ha iing ha sem jong ka Kong Fullness Lyngdoh ba la khlad noh ha katei ka jingjia ba sngewsih kthang bad ka Seng ka kular ruh ba kan don lang beit la ha kano kano ka rukom bad don kam ruh bad kiba ha iing ha sem jong itei ki kong ba la khlad noh ki donkam na ka bynta ban wad ia ka hok jong ka tei   ba khlad noh” La pynkut u Bah M H Dkhar.

 

What Next?

Recent Articles

Leave a Reply

Submit Comment
*