Pynrem jur ka AJYWO halor ka jingshah pyniap dusmon u heprit 9 snem ka rta ha la u kynum

Jowai, Naitung 01: Ka All Jaiñtia Youth Welfare Organisation (AJYWO)-Central Body, ka pynrem jur halor ka jingshah pyniap dusmon u wei u heprit ba dang 9 snem ka rta, na ka Shnong Umjalasiaw, West Jaiñtia Hills District, da kaba shah rahbor bad shah pynïap dusmon hala u jong u kynum, tang namar ka jingkwah pynhiar kput ïa la ka lok kaba dei ka hynmen jong u tei u heprit.

“Ka seng ka pynpaw ia ka jingsngewsih kthang halor ka jingbym long shngaiñ shuh ki heprit jong ngi, kynthei bad shynrang ha kine ki sngi ba mynta ha Ri Khasi-Jaintia. Ki kam pyntriem ba har rukom pyrshah ia ki khynnah ri, kynthei bad shynrang naduh ka jingleh be-ijot haduh ka jingpyniap, ka la nang kiew artet katba nang mih ki sngi bad kane ka apot kaba ki heprit ki ia kynduh ka la buh ia ka jingim jong kiwei pat ki heprit jong ngi, ha ka jingsyier bad ka jingbym shngain shuh ia la ka jingim.” Ong u Bah M.H Dkhar, President ka AJYWO Central Body.

Ha kawei pat ka liang, u Reachingson Siangshai, Vice President jong ka AJYWO- Central Body,  ua la ong ba ka seng ka ai ia ka jingiaroh ia ki pulit, kiba la shim khia bad trei shitom ha ka ba thwet bad ioh kem syndon ia  u Shiningstar Pala bad u Pynshemi Pahara ki ba la don kti kat kum ka jingphla jong ki ha ka ba shim noh ia ka jingim jong une u heprit.

“Ka seng ka kyntu ruh ia ki pulit ba kin pynkloi ia ka jingtohkit bad ka charge sheet pyrshah ia kitei ki runar khhang ba ka Iing Bishar kan ioh leh ia kaba donkam. Ha ka juh ka por ruh ka seng ka kyrpad ruh ia ka Iing kashari ban leh da kaba tyngeh ia kitei ki arngut ki riew thrangsnam, ban nym ai jamin ia ki bad ruh ban pynsted ia ka jingbishar khnang ban ai ia ki ia ka jingpynsaja da kaba tyngeh kat kum ki kyndon aiñ.” Bynrap shuh shuh u bah Reachingson Siangshai.

U Bah M.H Dkhar u la ong ruh “Ha ka jingiadei bad ka jingpyrshah jong ki pulit bad ki Iing Bishar ban tem ia ki kam thombor, jingshah leh-beijor, shah pyniap  bad kiwei kiwei de ki kam pyntriem pyrshah ia ki khynnah rit, ka seng ai mynsiem bad kyrshan pura ia ki pulit bad ki Iing Bishar ba kin nang iaid sha khmat ban trei shitom da kaba tyngeh ha la ki jong ki kamram pyrshah ia baroh kito ki runar kiba don kti ha kiba kum kitei ki kam mrad khlaw bad ruh ka seng ka kyntu ia ki Iing bishar ba pher ba pher ba kin pynsted ia ka jingbishar ban pynioh iaka hok jong baroh kito ki heprit kiba lah shah thombor ne shah pyniap ne leh be-ijot ha ki runar, khnang ba kane ioh lehse kan lah ban tehlakam ia kiwei pat ki runar ban leh ia ki ba kum kine ki jait kam pyrshah ia ki heprit”.

“Kumjuh ruh, halor ka jingshah leh be-ijot jong ka kawei ka khynnah khunswet, khlem kmie khlem kpa, na East Jaintia Hills kaba dang shu dep pynmih shen ha u Mawphor jong u bnai Jymmang ba la dep mynta u snem, ia kaba la register case kat kum ka POCSO Act 2012 bad ha kiwei pat ki kyndon aiñ, hapoh Khliehriat Police Station, Khliehriat, ka seng kan ym shong kli kti hynrei kan sa buddien khlem jingshongthait ia katei ka kam” ong u Bah M.H Dkhar.

What Next?

Recent Articles

Leave a Reply

Submit Comment

*

Where to buy Vidalista Professional 20 Mg (Tadalafil) tablet