Jowai, Naiiwieng 03: Ka AJYWO Central Body ka pynrem jur halor ka jingpyniap dusmon ki riew thrangsnam la kum ia u mrad ia u Bah Maidar Tyngkan Dkhar bad dung pynmynsaw jur ia ar ngut kiwei pat ki samla ha ka shnong Mookhep, East Jaintia Hills, ha ka miet 30 tarik u Risaw, 2017. Ha ka jingiadei bad katei ka jingjia ba sngewsih, ka AJYWO ka dawa jur na ki bor jong ka aiñ ban thwet lut bad pynshitom jur ruh kat kum ki kyndon jong ka aiñ ia baroh kito kiba don kti ha ka ba shim noh ia ka jingim ba kordor jong utei u samla ba la khlad noh.
Ha u kyrwoh ba la phah da u Bah M H Dkhar, President jong ka Ka AJYWO Central Body, ka seng ka dawa ruh ia ki bor jong ka aiñ ba ki dei ban kem bad pynshitom jur ruh ia u lane ka trai jong kato dukan die kiad beaiñ kaba don ha Mookhep namar dei lyngba jong katei ka dukan kiad ba sa mih katei ka jingjia ba sngewsih kthang ha katei ka miet.
“Ka seng ka pynrem jur ruh halor ka jingbymler jong ka Excise Department jong ka sorkar jylla ban tem ia ka jingjyllei jong kiba kum kitei ki dukan die kiad beaiñ ha ki ba bun ki bynta jong ki arliang rud surok jong u NH-6 bad ha kiwei ki kyndong kynshrot ruh” ong u Bah M H Dkhar.
U Bah Dkhar u la ong shuh shuh ba dei ka jingjyllei jong kiba kum kine ki jaid dukan die kiad beaiñ ha kiba bun ki bynta jong u NH-6 ba sa mih ka kynrum kynram, ka pait ka pra bad ki jingjia ba sngewsih ha ka long iing longsem, ha ka shnong ka thaw bad ruh ha ka imlang ka sahlang.
“Ka AJYWO ka phylla haduh katta katta halor ka jingjyllei jong kiba kum kitei ki jaid dukan kiad beaiñ. Hooid ia ki wine-store la dep phah pynkynriah kham pajieh na ki National Highway bad State Highway da kaba pyntrei kam ia ka hukum jong ka Iingbishar Ba Don Burom bad ba ha Ha Khlieh Duh jong ka ri, hynrei kaba lyngngoh ka long ba, ha halor kano ka kyndon aiñ pat ba la shah lane ailad ia kiba kum kitei ki dukan kiad ban don ha ki arliang rud surok jong ka NH-6?” ong shuh shuh u Bah M H Dkhar.
“Hato don ne em kaba special permit lane license na ka sorkar na ka bynta kiba kum kitei ki jaid dukan kiad ban don ha rud surok jong ka NH-6? bad lada kam don kaba kum kata, shaei jah ka Exercise Department jong ka sorkar kaba dei tem bad pynduh jait ia kiba kum kitei ki jaid dukam ki ba buh ia ka mynsiem briew, ia ka longing longsem, iaka shnong ka thaw bad ka imlang ka sahlang ha ka jingma kaha khraw?” ong shuh shuh utei u nong ialam jong ka AJYWO.
“Ka seng na ka bynta ka bha ka miat jong ka imlang ka sahlang khamtam ki khun samla jong ka Ri bad ka Jaidbynriew, ka dawa jur na ka Exercise Department jong ka sorkar jylla ba kam dei ban thiah sngi hynrei ka dei ban trei la ka jong ka kamram ba la bynshet ha ka ha ka ban tem bad pynduh jait shisyndon ia baroh ki dukan kiad beaiñ, khamtam kito ki ba don ha ki ba bun ki bynta rud surok jong ka NH-6 ba dei sam lyngba ia ka East Jaintia Hills” pynkut u bah M H Dkhar.
