Shillong, Kyllalyngkot 11: Na ka liang ka CoHSO ka ai khublei ia baroh ki Para Ri bad ki paidbah nongshongshnong ka Ri Lum Khasi-Jaintia kiba lah ia kyrshan ia ka prokram jong ka kynhun lyngba ka jingsangeh iaid kali kaba lah long hynnin ka miet naduh ka 7baje janmiet haduh 5baje mynstep.
Ka kynhun ka pynpaw ia ka jingkmen ban iohi ba kum ka Jaidbynriew ngi don ka jingiatylli bad jingiatreilang halpr kane ka mat ban pyrshah ia ka jingthmu jong ka Sorkar India lyngba ka jingwanrah ia ka Ain iakjakor kata ka Citizenship Amendment Bill 2016 kaba long ka ain khlam bamduh ia ka Jaidbynriew Hynniewtrep hynniewskum jong ngi.
Ka jingiatreilang ka jong phi ka pynpaw ruh ia ka sur kaba jam sha ka Sorkar NDA hapoh ka jingialam jong ka BJP ba kum ka Jaidbynriew ngi pyrshah horkit hordang ia kne ka jingthmu buitpoh ka jong ki ban iuhroit ia ngi ki ritpaid.
Ka CoSHO kala long ba ka jingiakhun kam pat kut bad nang ne shakhmat kin nang ia pynjur ki jingiakhih pyrshah ia ka Sorkar India da ka jingiatreilang jong baroh namar kumba ka long hi ia kane ka Bill kin dang lah ban wanrah ha ka Sien shong jong ka Rajya Sabha ka ban long ha u bnai Rymphang mynta u snem.
Ka kynhun lyngba kane ka kyrwoh ka pynrem jur Ruh ia kito ki riewshim kabu kiba lun maw bad pynjulor ia ki kali jong ki nongthoh khubor bad jong ki riewshimet ha ki kynta jong kane ka jingiakhih namar na ka liang ka jong ngi naduh kaba sdang hi ngi lah pyntip bad pynbna ba kadei ka jingiakhih da ka jingiatreilang jong baroh ki Para Ri bad khlem da pynbor iano iano ne pynjulor ia kiei kiei.
Kane ka jingleh bad shah pynjulor ka kali ki nongthohkhubor ka lah ban dei ka jingpyrshang jong ki nongshim kabu ban pynthohbria ia ka Kynhun hi baroh kawei ia bad ka CoSHO ka pynrem jur ia kane ka jingjia.
