Pynrem jur ka seng FKJGP ia ki 4 ngut ki runar ba shoh ia u Bah Damas Nongkhlaw

Shillong, Risaw 05: Ka FKJGP Upper Shillong Circle hapoh ka jingialam jong u Samla Kitboklang Nongphlang, President FKJGP Upper Shillong Circle ha ryngkat ka jing synran lang da u Samla Mac Donald Kharkongor, Vice – President FKJGP Upper Shillong Circle lem bad ki Nongialam ba hakmat eh jong ka FKJGP Mawnianglah Unit, Seng Longkmie Mawnianglah mynta ka sngi ka 5th October 2017 ki la leit ban synran lang kum ka jing ai mynsiem ia kiba haing ha sem jong u Bah Damas Nongkhlaw sha Mawngap Police Station ban dawa na ki bor jong ka Ain ba kidei ban kem mardor bad ban ai da ka jing pyn saja kaba tyngeh pyrshah ia u Everest Hynniewta, Richard Umdor, Mostly Shylla bad Pynjanai Synshong  kiba donkti ha kaba shoh bad pyn mynsaw ia u Bah Damas Nongkhlaw.

Kumban shu pynkynmaw ba ha ka janmiet jong ka 24 tarik September 2017 ha ka por kumba 5:00PM U Bah Damas Nongkhlaw udei ruh u briew uba don ka jingduna ha ki dkhot met, bym iohsngew bad bym nang kren uba shong ba sah ha ka Shnong Mawñianglah, Upper Shillong, u la shah thombor ha kitei ki saw ngut ki riew runar ha kaba kila shoh la dat ia u haduh ba u la mynsaw jur na ki bynta jong ka Dur khmat bad kiwei de ki bynta jong ka met. Katkum ka jingiathuh jong kiba ha ing ha sem jong utei u Riew Rangbah uba la ngat ha katei ka apot la ong ba kitei ki saw ngut ki Runar ia kiba la tip kyrteng kum u Everest Hynniewta, Richard Umdor, Mostly Shylla bad Pynjanai Synshong ym tang ba ki la shoh la dat ia u Damas Nongkhlaw hynrei kila lute ruh wat ka ka pisa katba don ha ka met jong utei u Riew Rangbah. Katkum ka jingiathuh jong ka Kong Rilang Nongkhlaw ba dei ha ka miet jong ka 27 tarik September 2017 ka jingshitom kala sdang ban ban jur bad kumta la pynkit noh ia u Bah Damas Nongkhlaw sha Nazareth Hospital khnang ba un ioh ia ka jingsumar.

Na ka liang jong ki Nongialam jong ka FKJGP Upper Shillong Circle hadien ba la ioh jingtip ba ia u Bah Damas Nongkhlaw la pyllait noh na Hospital, kila leit ban iakynduh kyrpang ia kiba haing ha sem jong utei u Riew Rangbah uba la ngat ha katei ka apot ha ka 3 tarik October 2017 bad hadien ba la ioh ia ki jingshai baroh na ka liang jong ka Seng ha ryngkat bad u Bah Starwin Kharjana, President Khasi Disabilities Association ha ka 4 tarik October 2017 kila leit ban iakynduh ia u Bah Vivek Syiem,  SP City ban kyntu ban shimkhia bad ban tuklar lem ia katei ka kam kaba ktah ia ka hok jong ki briew kiba don jingduna ha ki Dkhot met (The Rights of Persons with Disabilities Act, 2016)

Da ka jingshimkhia jong u SP City, Bah Vivek Syiem na ka liang jong Ki Pulit Mawngap Police Station kila bthah ia ka Kong Rilang Nongkhlaw ka ba dei ka para khatduh jong u Bah Damas Nongkhlaw ban wan mih ha Police Station ha ka mynta ka sngi  ban pyntikna la yn iaid shakhmat ia ka mukotduma  lane na ka liang jong kiba ha ing ki kwah ban jied ia ka lynti jong ka jing pyn ia suk. Na ka liang jong ki ba haing ha sem jong u Bah Damas Nongkhlaw kila pynpaw shai kdar ba kin ieng skhem ha ka Nongrim ban dawa ia ka Hok jong u Nong shah Thombor bad ba dei ban pynshitom ia baroh kiba donkti ha kaba thombor ia u Bah Damas Nongkhlaw.

Haba kren sha ki lad pathai khubor U Samla Kitboklang Nongphlang, President FKJGP Upper Shillong Circle u la ong ba ka Seng ka pynrem jur ia katei ka jingshah thombor da kaba bynrap ba “U Bah Damas Nongkhlaw u bym iohsngew bad u bym nang kren, Hato kitei ki Saw ngut ki don daw aiu pyrshah ia u ? Ngi ju tip ba na ka jingkren bakla ka ktien shait mih ka jing bym ia sngewthuh jingmut, ka jing ia shoh ia dat bad kumta ter ter, hynrei u Bah Damas Nongkhlaw udei u briew u byn nang kren bad u bym ioh sngew kat kum ka Disability Certificate bala issue da ka District Medical Board kaba pyntikna ba lada kiwei ki tim ki tla ruh um iohsngew satia, Hato lada ym dei kita ki Riew Thrang Snam balei kin shu shoh bein ia u” shuh shuh na ka liang jong u Samla Kitboklang Nongphlang u la ong ba na ka liang jong ka seng ka dawa ba kitei ki Riew Thrang Snam kidei ban siew ia baroh ki jinglut jing sep naduh ki bai dawai dashin kiba la sumar ia utei u Riew Rangbah ha Nazareth Hospital bad ha Bansara Eye care Centre.

 

 

 

What Next?

Recent Articles

Leave a Reply

Submit Comment
*