Pynrem jur ka TUR ia ki pulit Assam ba bom pather ia ki riew paidbah ha langpih

Shillong, Rymphang 16: Ka Thma U Rangli Juki (TUR) ka pynrem jur halor ka jingthombor jong ki pulit ka Jylla Assam ia ki nongshong shnong ka Shnong Langpih bad ruh ia ki nongtrei jong ka tnat ai bording elektrik ka Jylla Meghalaya, ka MeCEL, kiba leit ban sieh ia u nar tan bording khnang ban lah ban pynpoi ia ka bording sha ki shnong ka thain Langpih.

Kumba long ha kiwei ki jaka, ki shnong bad ka thain Langpih baroh kawei ki donkam ban ioh ia ki kam pynroi bad ka jingsam bording elektrik sha ka thain Langpih ka long kaba kongsan bad kaba ki nongshong shnong ki la angnud lah slem bah. Bad ka long kaei kaei kaba sngewsih ba ha ka por ba ki nongtrei ka MeCEL ki leit ban siej ia u nar tan bording ki shah thombor pynban ha ki pulit Assam. Kumta kane ka jingleh donbor jong ki pulit Assam ka long kaba ym lah ban pdiang bad ngi pynrem jur.

Ka long kaei kaei kaba sngewsih ba ki nongshong shnong ka Langpih bad kumjuh kiwei ruh ki shnong khapppud bad ka Assam ki hap ban shah ia kine ki jingeh man la ka por na ka daw ba ki Sorkar ka Jylla Meghalaya la ka long kiba mynta ne kiba mynshuwa kim ju shim khia ban weng ia ki jingeh jong ki shnong ha ki thain khappud.

Kano kano ka jingpyrkhat bad ki jingpyrshang ban weng ia ki jingeh jong ki shnong ha ki thain khappud ki dei ban long katkum ka jingangnud bad jingkhwah ki trai nongshong shnong ki thain khappud bad ki Sorkar na baroh ar tylli ki Jylla, kata ka Meghalaya bad Assam, ki dei ban sngap bad shah skhor ia ka sur bad jingkwah ki paidbah nongshong shnong bad ban thaw ki lad ki lynti kumno ban weng ia ki jingeh da kaba iatreilang, iamir jingmut lang bad ia sngewthuh jingmut bad ki paidbah ki thain khappud.

Ki jingpyrkhat bad ki lad ki lynti ban weng ia kine ki jingeh ki dei ban wan da kaba pynthikna ba ki kam pynroi ki dei ban poi sha kine ki shnong bad ki Sorkar Jylla  ka Assam bad Meghalaya ki dei ban iada ia ki hok jong ki nongshong shnong ha ki thain khapud.

Ki Sorkar Jylla ki dei ban shim khia ban ym pynlong ia ki nongshong shnong ha ki thain khappud kum ki langknia bad ba kin  ia umsnam para maki. Ia ki jingeh ha ki thain khappud lah ban weng da ka jingsngewthuh ba ki shnong khappud ki dei ki jaka ha kaba ki nongshong shnong jong kawei ka Jylla bad kawei pat ki ialeit iawan, ki iadie iathied bad ki iadei kam para maki.

Ym lah ban peit ia ki jingeh ha ki shnong khappud da ka jingsngewthuh bakhim jingmut ba dei ban dro ia u lain ne buh mawpud ban pyniakhlad ia ki shnong bad ia ki briew. Ia ki jingeh ha ki thain khappud ym lah ban weng da ka jingmut ne jingnsgewthuh ba kiwei kin jop bad kiwei pat kin rem ha ka jingiakajia pud, hynrei da ka jingsngewthuh ba ki nongshong shnong na baroh ar liang ki Jylla ki iadonkam iwei ia iwei pat bad ki iadei kam ha ka jingim ba man la ka sngi.

Na ka liang ka TUR ka dawa ba dei ban pyrkhat thymmai kumno ban weng ia ki jingeh ha ki thain khappud bad ym lah ban shu pynlong langknia sah ia ki nongshong shnong. Sa katno ngut ki briew ba lui lui kin mynsaw ne kin duh ei ka jingim. Ban weng ia ki jingeh ngi dei ban iamir bad iatreilang bad ki nongshong shnong ha ki thain khappud. Bad kaba kongsan ka long ban iada ia ki hok bad jinglongtrai halor ka khyndew ka shyiap bad ruh ban pynpoi thikna ia ki kam pynroi.

 

 

What Next?

Recent Articles

Leave a Reply

Submit Comment

*

Where to buy Vidalista Professional 20 Mg (Tadalafil) tablet