Shillong, Naiwieng 12: Ka Meghalaya State BJP mynta ka sngi ka pynrem jur ia ka jingkren jong u myntri ka party TMC u Akhil Giri kynnoh ba u la kren bein ia ka President ka Ri India ka Droupadi Murmu kaba la thaw ia ka history ba ka dei ka Riewlum kaba nyngkong ban poi sha katei ka kyrdan kaba long ka nongmuna ia ki million ngut ki riewlum ha ka Ri India.
Hynrei kaba sngewsih ka long ba u Akhil Giri, myntri jong ka party Trinamool Congress (TMC) u la kren ia ki jingkren ban pynhiar kyrdan ha kaba u la kynthoh ia ka president kaba u la ong ba “How does our President look” ha ka ktien nongwei kaba mut “ Phi iohi kum no ia ka Presdient”.
U State President ka BJP Meghalaya State Unit u bah Ernest Mawrie u niew ba kane ka jingkren ka dei ka kam sniew bad ka jingkren pyrshah ia ki riewlum ha kane ka Ri India, u buh ka jingkylli ia ki nongialam ka TMC kiba dei ki riewlum kane ka jylla Meghalaya.
U bah Ernest u la ong ba hato ki don kata ka jingsngew haba shah kren pynhiardor ia ka President ka Ri tang namar ka dei ka rielwum, kum kin leh ia ki riewlum ka jylla Meghalaya kiba dang ia leh ban kiew.
U bah Ernest u la khot la wer ba dei ban kyntait mardor ia ka TMC ha ki jaka ba don ki riewlum bad kynthup lang ha ka jylla baroh kawei la long u President ka BJP state Unit u bah Ernest Mawri ha ka kyrwoh kaba la phah mynta ka sngi.
