Shillong, Naiwieng 16: Mynta ka sngi ka jylla Mizoram kala pynrem ia ka jylla Meghalaya ha ka jingialehkai kynjatball da 2-1 ha ka U-21 jong ka 2nd North East Olympic Games 2022 kaba la long ha madan MFA Turf, Polo Ground, mynta ka sngi. Kane kala pynjew ia ki hajar ngut ki riew ieit ialehkai kynjat ball kane ka nongbah Shillong.
Ha ka jingialehkai ka jylla step kala long ka jingialehkai kaba itynnad ha kaba ym shym ioh lat ban thep kol, hynrei ha ka minit kaba 54 u Rohlupuia u la thep ia ka kol kaba nungkong na ka jylla Mizoram, bad ha ka minit kaba 80 la thep biang sa shikol da u Malsawmtluanga bad tang hapoh shiminit u Oresterwell Langshiang la ioh ban thep kol na ka bynta ka jylla Meghalaya.
Ha kane ka jingialehkai kaba mynta ka sngi ka madan kala dap man da ki nongwan peitkai bad ki briew kila ia ap palat kynta shuwa ban sdang ka jingialehkai wat ha pdeng ka jingshit ka sngi, na ka liang jong ka MFA kala buh ruh ia ki skrin kiba heh ban peit ki paidbah ha katei ka madan ba kito ki bym ioh ha madan kin ioh ban peit.
Ha kane ka jingialehkai hapdeng ka Mizoram bad ka Meghalaya ha ka kylla step kumba 10 minit ei ei ka jingialehkai la nion hi da ka jylla Mizoram hynrei suki ki rangialehkai ka jylla Meghalaya ruh kila sdang ban kham ia ryngkat bor ban ia khun pyrshah ia ka jylla Mizoram.
Ka jingialehkai kala sdang ban kham khluid ha dien ha kaba u Rohlupuia’s la thep ia ka kol, ki rang ialehkai ka jylla Meghalaya kala ioh bun sien ka lat hynrei kim shym la lah ban thep kol, hynrei ka Mizoram kala ioh ban thep biang lyngba u Mawawmtluanga.
Ha kane ka jingialehkai ka Meghalaya kala ioh ban thep shikol da u Oresterwell Langshiang, wat la ki rangialehkai ka jylla Meghalaya kila pyrshang tyngeh hynrei kim shym la lah ban pyniaryngkat bad ka jylla kala ioh ia ka nam lahduh ha kane ka jingialehkai kynjat ball ha ka 2rd North East Olympic Games 2022.
Ia ki khusnam la sam da u Myntri Rangbah ka Jylla u Conrad K Sangma, ryngkat u Myntri ka tnat ialehkai u Bah Banteidor Lyngdoh, u Chief Secretary Bah Donald P Wahlang bad kiwei ki heh ophisar kiba la iadon lang ha kane ka sngi.
