Shillong, Nohprah 26: Mynta ka sngi u bah George B Lyngdoh Vice President ka Meghalaya Trinamool Congress ba dei ruh u MLA sha ka iing dorbar thawain ka jylla Meghalaya u la ong ba kum ka party ka pynrem jur ia ka jingpan jingkhien ka sorkar Assam ia ka jingdon ki iing mane khristan ha Assam.
U bah George haba kren ha ki lat pathai khubor ha ophis treikam jong ka party la ong ba katkum ka jingthoh kaba la phah na ka ophis jong u Special Branch jong ki pulit ka Asam sha ki Deputy Commissioner bad sha ki Superintendent ki puit jong ka jylla Assam ba kin shim jingkhien ia ka jingdon ki iing mane.
Kane ka jingleh jong ka sorkar Assam kaba la ialam da ka BJP ka kren shai ia ka jinglong bym khien snep ka jong ka ia ki paid khristan kiba don ha katei ka jylla bad kane ka long ka jingmaham sha baroh ki paid khristan, ka seng ka pynremjur ia kane ka jingleh ka sorkar BJP.
Halor ka jingong u myntri rangbah ka jylla Assam ban ong ba um tip ei ei, kane ka dei tang ka jingleh mynleh kumno kat ia katta ka jingpan jingtip, khlem ka jingtip ka sorkar kan nym lah ban long ban phah ia kum katei ka jingpan jingtip na ka tnad pulit SB na ki DC bad ki SP ka jylla.
Ka TMC kaba dei ka party ban iada ia ki rit paid ka pynrem jur ia kane ka jingleh ka BJP ban pan jingkhein ia ka jingdon ki iing mane ha jylla Assam bad kane kan ktah bha ia ki paidbah Khrisatan ha katei ka jylla.
