Shillong, Jymmang 15: ka jingialang jong ka kabinet mynta ka sngi kala pdiang ia ka Meghalaya State Agricultural Produce and Livestock Marketing Promotion and Facilitation Bills, 2020, ia kaba yn sa wanrah ha ka dorbar mang tyngka ka ban long ha ka 20 tarik mynta u bnai.
Haba kren ha ki lad pathai khubor u bah Prestone u la ong ba lyngba kane ka bill kaba yn sa leit ban rah hapoh ka iing dorbar, ka kabinet kala pynrung thymmai hapoh katei MSAPLMPF Bill, 2020, ia ka kam Ri Jingri, ki Dawai kynbat bad ka kam Ri Dohkha.
Haba ia dei bad kane ka sorkar kala khot ia ka jingialang ia ki CEM jong ki lai tylli ki District bad ha kane ka jingiakren na ka liang jong ki CEM kila pynpaw ba kane ka bill kam dei ban ia tyngkhuh bad ki bynta jong ki District bad na ka liang jong ka sorkar kular ba kane ka bill kaba kan sa wanrah kan nym ktah ia ki bor jong ki District Council.
U bah Prestone u la ong ba ia ka Meghalaya Agricultural marketing Act la pdiang da ka iing dorbar ha u snem 1980, ka jingkwah jong ka sorkar ban wanrah ia ka jingpynkylla ha kaba ia dei bad kane ka ain ka long ban pynrung thymmai ia ka kam Ri Jingri, Dawai kynbat bad ka kam ri Dohkha.
Ha ka jingialang jong ka kabinet ka tnad planning kala wanrah ia ka mat jingiakren ha kaba ia dei bad ka “Chief Minister Task Force on Economy for the post COVID-19”. Haba ia dei bad kane ka kabinet kala pdiang bad kan don ka Executive Committe bad ki dkhot jong ka ha kaba u Myntri Rangbah ka jylla un long u sharman jong ka Committee.
U Deputy Chief Minister u la iathuh ba kin don ruh ki kynhun trei kam hynriew tylli bad kine ki kynhun trei kam kin trei hala kam jong ki kumba la bynshet bad kin rah ia ka kaiphot sha ka executive Committee bad na ka executive Committee yn rah biang sha ka kabinet ban ioh ia ka jingmynjur.
