Shillong, Jylliew 17: Ha ka sngi Baar haba u Symbut Myntri Rangbah ka jylla u bah Prestone Tynsong u leit ban jurip ia ka Iewduh ryngkat myntri ba dei peit ia ka tnad pynroi sor u bah Hamletson Dohliang, na ka liang jong u Syiem ka Hima Mylliem u la shim ia ka lat ban pynsngew ia ka jingeh ha kaba ia dei bad ki pipe um ha Iewduh.
Ka jingdon ka Top Um jong ka sorkar ha khlieh Iewduh kaba pynpoi um sha ki shnong kum ka Mawkhar, Wahthapbroo, Quallapaty, Jaiaw, Umsohsun bad kumjuh ia ka Iewduh, ki pipe um ban ring um sha ki shnong bapher bapher kila kynton ha lynti iaid bad kane kala buh shisha ia ki jingeh ia ki paidbah.
Ban pynsuk ia ki paidbah ha ka iaid ka ieng ka Hima Mylliem kaba peit ia kane ka iew kala shna ia ki maw jam ha jrong jong kine ki pipe um, ia kane ka jingshna la iohi hi da u Bah Hamletson Myntri kam pynroi sor ha ka sngi Baar ba u leit ban jurip ia katei ka iew, u Pa,im Ainam Syiem u la pynsngew ia kane ka jingeh sha u myntri pynroi sor.
Ka tnad sam um jong ka sorkar jylla kala shna thymmai ia ka top um kaba don ha katei ka jaka bad kane ka jingtrei ka dang iaid haduh mynta. Ha kane ka sngi u symbut myntri rangbah ka jylla ruh u la iohi ia kane ka jingkynto ki pipe um kiba la ring na ka top um kaba don ha katei ka jaka.
