Shillong, Risaw 01: Mynta ka sngi ka seng ki riew tynmen jong kane ka jylla Meghalaya kaba la tip kum ka “ Meghalaya State Senior Citizen’s Forum” (MSSCF) kala pynlong ia ka jingialang ha Mawprem Modern Higher Secondary School ban pynshai ia ki khynnah skul ia ka jingsniew na ka jingdih drok bad ka shnogkha khynnah.
U President jong ka seng u bah Herman Nongrum, ha ka jingkren jong u kum u kongsan u la batai halor kane ka seng jong ki riew tynmen, ha kaba u la iathuh ba ha ka Ri India baroh kawei ki riew tynmen ki don haduh 104 million ngut.
La batai ba dei lyngba ka jingshim khia jong ka United Nation ki ri ha ka pyrthei baroh kawei ki hap ban shna ia ka ain kaba kyrpang na ka bynta jong ki bad kum juh ka sorkar India kala leh ia kane bad ha kane ka jylla Meghalaya ruh kane ka seng kala don.
Ka jingshna ia ka ain ka long ba iada ia ki riew tynmen na ka jingshah ban bein ha jinglong tynmen jong ki ha kiba ha iing ha sem bad na ka bynta kito ki bym don ia ka jaka sah ka sorkar ka dei ban shna ia ki iing sah tynmen ha baroh ki District, ha Meghalaya ki don ar tylli ki jaka sah ki tynmen ia kiba la pyniaid da ki Sister.
Ha ka jingkren jong u General Secretary jong ka seng u Bah KL Basaiawmoit bad u Dr S Singh Vice principal jong ka skul, kila pynsngewthuh iaki khynnah skul kiba la wan ban ia shim bynta ba ka jingdih drok bad ka jingshongkha khynnah ka long ka jingsniew kaba ktah ia ka imlang sahlang bad ki dei ki maw jynthut ia ka roi ka par.
Na ka liang jong u General Secretary u la ong ba kum ki riew tynmen ki shim ia kane ka sin jam ban pynlong ia kum kane ka jingpynshai ka long ba ki don ka jingsngewkhia na ka bynta ka pateng ka ban wan bad ki kwah ba kane ka pateng kaba mynta kan kyntiew ia ka Ri kham shajrong.
Ha kane ka sngi la don ruh sa kiwei kiwei ki nongkren kiba la batai ba kumno ka jingdih drok ka ktah ia ka iing ka sem ka koit ka khiah ia ka imlang sah namar ka dei ka jingdih kaba sniew, kumjuh ka shongkha khynnah ka ktah ia ka long briew man briew ha ka pyrkhat pyrdain lada shong kha khlem pat dei ka por bad kine ki pyntlot ia ka Ri hi baroh kawei.
