Shillong, Nohprah 15: Mar ia wan phai na Delhi, U myntri rangbah ka jylla u Conrad K Sangma u la ia kynduh ia ki seng bhalang ha iing sah jong u bad ha kane ka jingiakynduh na ka liang jong u myntri rangbah u la pynshai ba ka jingkhot ia ka dorbar ba kyrpang ka long ban shim ia ka rai ban pyntrei kam ia ka inner Line Permit (ILP) ha kane ka jylla Meghalaya.
U bah Robertjune Kharjahrin Chairman jong ka Confederation of Meghalaya Social Organisation (COMSO) haba kren ha u SP News Agency u la iathuh ba kane ka jingiakynduh ia u myntri rangbah ka jylla ka long tang ban ioh ia ka jingshai kaba bniah ha kaba ia dei bad kata ka jingkhot ia ka dorbar ba kyrpang.
Ha kane ka jingiakynduh nalor jong u myntri rangbah ka jylla la don lang u president jong ka party UDP, u Bah Metbah Lyngdoh, u bah Lahkmen Rymbui bad u bah Brolding Nongsiej bad ha kane ka jingiakynduh na ka liang jong u myntri rangbah u la kren shai ha khmat jong ka COMSO ba ka jingkhot ia kane ka dorbar ba kyrpang kan long ban shim ia ka rai ban pyntrei kam ia ka ILP ha ka jylla.
Ha ka juh ka por na ka liang jong u myntri rangbah u la kren shai ha ki nongialam jong ka COMSO ba lada ka ILP kan trei kam noh ha ka jylla ka Citizenship Amendment Act, 2019 kan nym trei kam shuh ha ka jylla Meghalaya namar kala don lypa ka kyndon hapoh jong ka CAA, 2019.
Ha kane ka jingiakynduh na ka laing jong ka kynhun Regional Progressive Alliance (RPA) kaba kyntup iaka UDP bad ia ka UDP kila kren shai kdar ba ki kwah ba ka ILP kan treikam ha kane ka jylla Meghalaya.
U Chairman ka COMSO, u la ong ba ha kine ki sngi kin dang leit ia kynduh ia ki nongialam seng sain pyrthei jong ka Congress, ka BJP bad kum juh ia ka kynhun United Progressive front (UPF) ban pan ia ka jingkyrshan na kine ki kynhun ruh ba ki dei ban ai ka jingkyrshan ia ka sorkar ha kaba ia dei bad ka rai ban pyntreikam ia ka ILP ha ka dorbar kyrpang ka ban sa long shen.
