Shillong, Nailar 04: U Lat jong ka jylla u Banwarilal Purohit mynta ka sngi u la pynsmai ia u Dr Celestine Lyngdoh bad ia u Bah Cominggone Ymbon kum ki myntri kabinet jong ka sorkar jylla ha Raj Bhavan Shillong mynta ka sngi.
Kiba la ia don lang ban sakhi ia kane ka jingpynsmai myntri ki long u myntri rangbah ka sorkar jylla u Dr Mukul Sangma, u Shongknor jong ka iing dorbar u A T Mondal, ki myntri ha ka sorkar, u Bah A L Hek, Bah David Nongrum MLA, u Bah Titosstarwell Chyne MLA jong ka UDP bad ki heh sorkar.
U myntri rangbah haba kren ha ki nongthoh khubor ha dien ka jingpynsmai myntri u la ong ba kane ka jingbyjli minister kam dei kaba phylla ka dei kaba juh leh, ha ka jingshisha la dei ban don khah khah u la ong . Haba don ka jingbujli minister ka juhdon ka jingiakren da kumne da kumtai hynrei kine ki sah tang ha ka jingiakren.
Haba ia dei bad ki myntri kiba dang shu pynsmai mynta ka sngi, u Dr Mukul u la ong ba kine ki ar ngut kin sa sngewthuh ia ka rukom trei kam jong ka sorkar bad u don ka jingshaniah ha kiba ki lah ban shim ia ka jingkit khlieh bad ban ialeh ia ki jingeh kum ki myntri kabinet.
