The Prime Minister, Shri Narendra Modi arrives, in Chennai on October 11, 2019.
New Delhi, Iaiong 08: U Myntri Rangbah duh jong ka ri, Narendra Modi mynta ka sngi u la Iaphylliew jingmut bad ki nongialam jong ka iing dorbar thawain jong ki seng sain pyrthei bapher bapher ha Parliament, lyngba ka video conference.
U Myntri Rangbah duh ka ri u la ong ba ka pyrthei baroh kawei ka mad ia ka jingeh kaba khraw mynta namar ka COVID-19, da kaba bynrap ba kane ka jinglong jingman ba mynta kalong ka por jong ka jingkylla ha ka histori jong u briew bad ki dei ban lah ban iakhun na ka jingktah jong ka.
U la iaroh ia ki jingtrei tyngeh jong ki Sorkar Jylla da kaba iatreilang bad ka Sorkar Pdeng ha kane ka jingiakhun pyrshah ia ka jingpang. U la kdew ba ka ri ka la sakhi ia ki rukom treikam kiba tei bad kiba don ka jingkyrmen kaba bha lyngba ka jingiatreilang jong baroh ki bynta jong ka imlang sahlang ban pynpaw ka jingiatyllilang ha kane ka jingiakhun.
U la iaroh ruh ia ka mynsiem jong ka jingsngew don bynta, ka jingkitkhlieh, ka jingaiti ha kaba manla uwei pa uwei u nongshong shnong u la nohsynniang ha kane ka jingpyrshang, la ka long ha ka jingbud ia ka jingiajngai iwei na iwei, ka Curfew paidbah lane ka pakhang shnong.
U Myntri Rangbah duh ka ri u la kdew ia ka jingktah kaba mih na kane ka jinglong jingman, kumba la sakhi ha ki jingduna ki jingdon jingem. Hynrei, ka India ka la long napdeng ki katto katne ki ri kaba la lah ban tehlakam ia ka jingsaphriang u khniang jingpang haduh mynta. U la maham ruh ba ka jinglong jingman ka iai bteng ban kylla bad ki briew ki donkam ban long kiba peitngor ha baroh ki por.
U Myntri Rangbah duh ka ri u la kdew ba ka jinglong jingman ha ka ri ka iasyriem ia ka ‘social emergency’. Ka la pynlong ia ka ri ban shim ia ki rai kiba eh, bad kadei ban iai bteng ban long kaba peitngor. U la ong ba bun ki Sorkar Jylla, ki bor pyniaid distrik bad ki riew shemphang ki la kyrpad ban bteng ia ka bynta jong ka pakhang shnong.
U Myntri Rangbah duh ka ri u la ong ba ha kum kine ki jinglong jingman ba iai kylla na ka por sha ka por, ka ri kadei ban pyrshang ban wanrah ka jingkylla ha ka rukom treikam jong ka.
U la ong ba ka thong ba kongsan jong ka Sorkar kalong ban iada ia ka jingim jong manla uwei pa uwei u briew. U la bynrap ba ka ri ka mad ia ki jingeh ba khraw ha ka ioh ka kot namar ka COVID-19, bad ka Sorkar ka leh tyngeh ban jop ia ki.
Ki heh ophisar jong ka Sorkar India ki la ai ka jingbatai bniah halor ki sienjam ba la shim ban iakynduh ia ki jingeh kiba don, ba kynthup ka jinglong jingman jong ka jingsam ia ki jingmyntoi hapoh ka PM Garib Kalyan Yojana.
Ki nongialam ki la ai khublei ia u Myntri Rangbah duh jong ka ri namar kane ka jingialang, ki la iaroh ia ki sienjam kiba na ka por sha ka por ba u la shim bad ong ba ka ri baroh kawei ka ieng tylli bad u ha kum kane ka por jong ka jingeh.
Ki la iakren shaphang ka jingkyntiew ia ka koit ka khiah bad ka jingkut jingmut jong ki nongtrei jong ka koit ka khiah, ka jingkyntiew ia ki jingdonkam ba iadei bad ka jing test,ka jingdonkam ban iarap ia ki jylla barit bad ki UT bad ka jingtehlakam ia ki jingeh jong ka jingthngan bad ka jing duna bam.
Ki la kren ruh shaphang ka ioh ka kot bad kiwei kiwei ki lad treikam ban kyntiew ia ka jinglah bor ka ri ha kane ka jingiakhun pyrshah ia kane ka jingpang. Ki nongialam ki la ai jingmut ban bteng biang ia ka pakhang shnong bad ka jingpyllait ka ban long shi shi bynta hadien ba la kut ka pakhang shnong.
U Myntri Rangbah duh ka ri u la ai khublei ia ki nongialam namar ki jingai jingmut ba tei jong ki bad ki jingsngew, da kaba bynrap ba ka jingaiti jong ki ban iarap ia ka Sorkar ha kane ka jingiakhun ka pynthikna ia ka nongrim jong ka synshar paidbah jong ka ri bad ka mynsiem jong ka jingiatreilang.
U Myntri Sorkar Pdeng ba dei khmih ia ka Parliamentary Affairs, ki heh ophisar jong ka Sorkar India bad ki Nongialam jong ki seng sain pyrthei na kylleng ka ri ki la iashim bynta ha kane ka jingiaphylliew jingmut.
