Shillong, Risaw 05: U Maxwell G Momin nongshong shnong jong ka Rongjeng Silchang u la pyntip sha u Chief Conservator jong ka Forest ophisar wild life department, ba deipeit ia ka East Garo Hills, Williamnagar ha ka 3th Risaw 2017 ba ka don ka mrad Kangaro ha iing jong u Jonggat Momin hapoh ka shnong Rongjeng Silchang Agatchi Patal Gittim ha East Garo Hills District.
U Maxwell ha ka shithi ba u la pyntip sha u Chief Conservator jong ka Forest officer wild life department, ka East Garo Hills, Williamnagar, u la ong “ Nga kwah ban pyntip sha phi ba kalong kaei kaei kaba ym lah ban mutdur ba ka mrad Kanggaro kaba la tip ba ka don tang hapoh jong ka Ri Australia, la shem ba ka don ha shnong Rongjeng Silchang Agatchi Patal Gittim, ha East Garo Hills District naduh u Naitung 2017”.
Ha ka shithi ba u la thoh ban pyntip sha ki heh jong ka tnad khlaw u la kyrpad ban phah ia ki briew jong ka ophis ban ia da ia kane ka mrad kaba iaid wir mynta ban rah ia ka nam ka burom jong ka District ka jylla bad kum juh ia ka Ri baroh kawei bad ia kane ka shithi kaba la phah sha ka tnad khlaw la sakhi lang ruh da u Prainik Sangma u ba dei na katei ka juh ka shnong.
Haba u SP News Agency u la kylli na u Principal Chief Conservator of Forest (PCCF) jong ka sorkar jylla u CP Marak, na ka liang jong u la ong ba na ka liang jong ki heh ka tnad khlaw ba deipeit ia ka Wild Life kiba na Tura kin leit la shai ka sngi sha katei ka shnong ban wad ia ka jingshisha , ia mynta ym pat lah ban ong la ka dei ne ka lait katei ka jingkam kumba la ioh ia ka jingpyntip sha ka ophis jong ka tnad khlaw.