Shillong, Jymmang 15: Ka ophis jong ka Khasi Hills Autonomous District Council (KHADC) ka dei ka ophis paidbah kaba nyngkong ha ka jylla ban but ryntih ia ki jingbthah ban iada na ka jingsaphriang jong ka jingpang COVID-19 ha ka jylla Meghalaya da kaba pyndon kam ia ki “Thermal Scanner” ban peit bniah ia ki nongtrei bad kiba leit don kam ia ki briew shuwa ba kin rung ha katei ka ophis.
U Chief Executive Member jong ka KHADC u Bah Titosstarwell Chyne u la plie ia kane mynta ka sngi da kaba shah thew nyngkong da kane ka Thermal Scanner shuwa ban rung ha ophis, but sha u bah Teiborlang Pthaw EM bad kiwei pat ki para MDC, ki nongtrei hapoh jong ka KHADC bad ki riew paidbah kiba leit don kam ha katei ka ophis. La buh ruh ia ki jaka sait kti ba kin sait shuwa ba kin rung sha ophis hapoh jong ka KHADC.
Haka jingkren lyngkot na ka liang jong u CEM u la ong ba u sngewkmen ba lyngba ka jingtrei shitom jong ka Executive Committee ki ophisar baroh ba kila lah ban sdang mynta ka sngi ban but ryntih ia ki kyndon kiba la but ryntih ia ki jingbthah jong ka sorkar ba shuwa ban sdang ia ki kam ki jam hapoh ophis ha dien ba la weng ia ka korphiew ba dei ban shah ia ki nongtrei 33% bad 100% ia ki ophisar bad kumjuh ruh ban sanitize ia ki nongtrei bad ia kiba wan don kam hapoh ka ophis.
Ban bud ia ki kyndon na ka liang jong ka KHADC kala pynkhreh shuwa ban rung sha ophis la synreit dawai ia ki kali, shuwa ban rung sha poh hap ban sait ia ki kti bad shuwa ban rung pat hapoh ka iing jong ka ophis hap ban test iaka met jong ki bad lada ka palat ia kaba la buh na ka liang jong ka tnad ka koit ka khiah kine ki nongtrei ki hap ban phah noh ia kiba wan ba kin leit noh sha iing.
Kine ki long ki jingbthah khnang ba kin long ka lad jingiada ia ki nongtrei bad kum juh ruh kan don ka jingshngian ia kiba wan don kam, na ka liang jong u CEM u la ong ba don kam ia ka jingiatreilang na baroh ki MDC, ki Ophisar bad baroh ki nongtrei bad khamtam ia kiba wan don kam ba kin but ia ki jingbthah baroh, na ka liang jong u CEM u la ong ba kane kam dei ka jingpynirong hynrei dei ban but ryntih ym tang ba don u COVID-19 hynrei kan long ka jingiaid beit ia ryntih jong kane ka ophis na kawei ka snem sha kawei ka snem.
Kane ka jingtest ia ki briew ba leit ban don kam ha KHADC kam dei tang ha ophis jong ka KHADC hynrei ia baroh kito kiba leit ruh sha iing bishar jong ka KHADC ia ki nongtrei nongduh ki nongbishar bad haduh ki nongshah bishar. Ka KHADC kala thied ar tylli ki “Thermal Scanner” kawei la pyndon kam ha ka ophis bad kawei pat hapoh jong ka iing bishar.
