Shillong, Nailur 18: Ka long ka jingshisha katba dang iaid ki sngi ki snem ka jingioh lad jong ki mynder ban rung laitlan sha ka jylla Meghalaya ka la wan rah ka jingma kaba khraw ia ka jaitbynriew rit paid bad ka wei ka lad jingiada lane ka lad ban the lakam ia ka jingrung laitlain jong kiwei pat ki jaitbynriew sha kene ka jylla ka long ka ain Inner Line Permit.
Naduh ba sdang la iai dawa ia ka jingdonkam ban pyntrei kam noh ia kane ka ain khnang ban shngain ma kitrai jylla. Ha ba ban pyntrei kam iaka ILP kam mut ba ban khanglad iano iano ruh ban wan sha ka jylla Meghalaya hynrei ka jingthmu hi kadei ban the la kam ia ka rukom rung bad rukom mih bad baroh la ia tip ba ka sorkar hi lyngba ka committee ba la thaw da ka sorkar ka la mynjur bad ai jingmut ban pyntrei kam iaka ILP hynrei ka la long pynban ka jingpynbiet iaki paidbah na kawei ka por sha kawei pat.
Kiwei kiwei ki jylla hapoh ka Ri India ki pyntreikam ia kane ka ain, bad ka jylla Sikkim bad kiwei kiwei ki pyntreikam ia ka ain kaba long ia sriem ia ka ILP, na kata ka daw kan long kaba bakla ban ong ba ha Meghalaya kam long kaba lah ban pdiang.
Ka KHNAM ka kwah ban pynshai bha ba ka ain ILP kam dei ka ain ia sngewpher jaibynriew lane ka ain pyrshah ia kano kano ka jaitbynriew, hynrei kadei ka ain kan wan rah ka jingsuk ia baroh salonsar.
U bah Pyndap Saibon President ka KHNAM u la ong hap shlur ban kren ia ka jingshisha ba bun ki nongmih khmat kiba la juhkren bad pynsngewba la don kam iaka ILP hynreiyn da ki la long ki nongmih khmat ki kylla nih.
Bah Saibon u la ong ba ym kynmaw shuh ban don ka jingiathir halor ka jingwanrung ki briew sha kane ka jylla lane ban iatai ia ka mat ILP ha iing dorbar thawain ka jylla. U president ka KHNAM u la ong sha ei jah ki nongmih khmat kin ban rah ia kane ka mat ha iing dorbar ka jylla.
Ha ka bynta kaba nyngkong eh jong ki mat treikam ka seng la thoh ha ki dak kiba heh bad bashai “IMPLEMENTAION OF ILP” bad ki iai ieng skhem halor kane bad kin don ryngkat bad iai kyrshan iano iano ruh kiba dawa ia kane ka phang.
Hadien ka jingpyrshang jong ka sorkar pdeng ban wan rah ia ka CAB, hadien ka jingpyntrei kam iaka NRC ka la long kaba kham don kam bad kham kyrkieh ban pyntrei kam iaka ILP.
Ka jingpyn slem jong ka sorkar ban shim khia iaka mat wanrung kyrthep ki mynder ka la wan rah ka jingbitar ha kiba bun na kata ka daw la don kam ia ka ILP bad ka sorkar kadei ban pyntreikam noh kham kloi, shwa ban wan ka jingmynsaw.
