Shillong,Naitung 20: Ka Khasi Student Union (KSU) South West Khasi Hills mynta ka sngi ka leit buh ia ki 4 tylli ki mat jingdawa na ka myntri ka Koit ka Khiah ka kong Roshan Warjri ba ka dei ban pynbiang noh ïa baroh ki jaka ai jingsumar sorkar kiba la shu ieh khongreng khlem da lah ban pyntrei kam shuh da ki snem na ka bynta ka jingmyntoi ki paidbah ka thain.
U samla Forwardman Nongrem u president ka KSU SWKH ha kren sha ki lad pathai khubor ula kyntu ïa ka sorkar ba kadei ban shimti noh ïa Wahkaji Primary Health Centre kaba dei ka jaka ai jingsumar ka UCIL kaba la shu ieh jyndat kumba 15 snem ïa katei ka PHC hadien ba kim ïoh ban tih ïa mar Uranium na katei ka thaiñ.
Shuh shuh ula ïathuh,ka Wahkaji PHC ka donkam ia ka um,ka bording nalor kiwei de ki jingdonkam ha ka PHC,ban thung kam ia ki doktor,ki nurse bad ki nongtrei khnang ban yn lah ban ai jingshakri ba paka sha ki paidbah kiba donkam ia ka jingsumar.
Shuh shuh ula iathuh,ka jingpynslem ban buh ia ki 100 tylli ki jingthiah ha Community Health Centre (CHC) ha Mawkyrwat na ka daw ka jingkynriah ia ka kamra ka la wanrah ia ka jingeh kaba khraw ia ki paidbah.
“Ka jingai jingshakri ban sumar ia ki paidbah ha ka Community Health Centre (CHC) Ranikor kam biang shuh na ka daw ka jingbym biang ki doktor ki nurse bad ki nongtrei ha katei ka jaka ai jingsumar”,la ong u Forwardman.
“Ngi buh ia ka jingdawa na ka sorkar ba ka dei ban kyntiew noh ia ka Nonghyllam Primary Health Centre (PHC) sha ka Community Health Centre (CHC) kaba ki paidbah ki ju ia kynduh ia ka jingeh ban ioh ia ki lad jingsumar na katei ka PHC katba ki paidbah ki dang bun kat dang mih ki sngi”,la ong bynrap u samla Forman.
Na ka liang ka Myntri ka koit ka khiah ka Kong Roshan Warjri ka la pyntikna shen kan sa pynbiang ia ki jingdonkam ha ki 4 tylli ki jaka ai jingsumar sorkar kumba la pynpaw da ka KSU.
