Jowai, Iaiong 15: Ka All Jaintia Youth Welfare Organisation Central Body ka pynpaw ia ka jingpyrshah kaba jur halor ka jingmih ka ishu Work Permit na ka bynta ki nong Bangladesh na ka sorkar MDA hapoh ka jingialam u Conrad K Sangma, kum u Chief Minister ka Jylla.
“Ka AJYWO ka pyrshah jur halor halor ka Work Permit ia ki nong Bangladesh. Nalor ba ka jylla ka lah jyllei da ki barjylla bad mynder ri kum ba Bangladesh bad Nepal kiba wan khaii pateng bad trei bylla beaiñ bad ruh wat ka shong ka sah beiñ sha Meghalaya kaba la ktah ia ka ioh kam ioh jam bad ka jakpoh jong ki trai ri trai muluk khamtam ki samla khlem kam khlem jam jong ka jylla, mynta pat, ka sorkar ka iakren sa ia ka Work Permit ia ki nong Bangladesh kaban sa ktah jur shuh shuh ia ka ki trai ri trai muluk ha ki ba bun ki bynta”, ong u M H Dkhar President, ka AJYWO Central Body.
U Bah Dkhar u la ong ruh, “Ha ka jingshisha, ka sorkar ka la dei ban khynra shwa ia kine ki barjylla bad nongwei kiba wan khaii ne trei bylla beaiñ sha ka jylla jong ngi, kiba la kurup lut ia kiba bun ki lad kamai jakpoh naduh ki ba heh haduh kiba rit tam, kaba la ktah iaka ioh kam ioh jam jong ki trai ri trai muluk bad ruh ha ka jingshisha ka sorkar ka la dei ban pyndam noh noh wat ia kito ki ba la ioh ia ki kot ki sla ba biang na ki tnad sorkar ba pher ba pher na ka bynta ka khaii-pateng bad trei bylla jong ki hapoh ka jylla, khnang ban ailad bad pynshlur ia trai ri trai muluk, khamtam ia ki samla khlem kam khlem jam, hynrei ka sorkar ka klet pynban ia ki briew la jong bad pyrkhat pynban mynta na ka bynta ka bha ka miat sha bar ri (Bangladesh)”.
“Ki seng ba pher ba pher ha ka jylla, haduh mynta ruh, ki dang dawa na ka sorkar jylla ban thaw ia ki aiñ kiba pyrkhing ban teh lakam ia ka jingwan rung kyrthep ki nongwei sha kane ka jylla jong ngi kaba la buh ia ka jaid bynriew rit paid, trai ri trai muluk jong ngi mynta ha ka jingma hynrei kaba pynlyngoh pynban ia ngi, ka long ba, kumno ka sorkar MDA, kaba ki paidbah ki khmih lynti ba kan trei hok na ka bynta ka bha ka miat jong ki trai ri trai muluk, mynta, marsyn ioh bat ia u lakam synshar ha ka jylla, ka peit pynban ki khmat kliaw na ka bynta ka bha ka miat jong ki Nong Bangladesh”, la bynrap shuh shuh u Bah Dkhar.
“Ha kano ka nongrim ba ka sorkar MDA, ka pynktha khlieh ialade mynta na ka bynta Work Permit ia ki nong Bangladesh? Hato ngi ki trai ri trai muluk jong ngi mynta, ki lah la dap la biang lut? Hato, ki khun samla jong ngi baroh mynta ki la ioh kam ioh jam lut? Hato mynta ki briew jong ngi kim donkam trei bylla shuh namar kata hap wan rah nongtrei bylla noh ia lade na Bangladesh? Ka sorkar jylla ka dei ban jubab ia kane sha ki paidbah jong ka jylla.
“Ko sorkar MDA, ngi pyrshah jur ia ka Work Permit jong phi na ka bynta ki nong Bangladesh. Pyndam noh shisyndon ia ka jingleh-bunkam bad pynktha khlieh jong phi na ka bynta ka Work Permit ia ki bar ri. Ka 5 snem jong phi, kane la jan kut. Pynlut noh ia ka por, ka bor, ka kor bad ka jingstad jong phi na ka bynta ka roi kapar jong ka jylla. Pyrkhat noh na ka bynta ka bha ka miat bad ka iap ka im jong ngi ki trai ri trai muluk rit paid. Thaw noh ia ki aiñ ba pyrkhing ban iada ia ngi ki trai ri trai muluk rit paid na ka jingshah tyllep ha ki heh paid nongwei. Pyrkhat kyrpang lem na ka ka bynta ka ioh kam ioh jam ki khun samla ka jylla khnang ba kin ym shang makia, leit tuh, lute bad ngop ha ki kam sniew ba laiphew jait na ka bynta la ka jakpoh. Thaw noh ia ka Youth Policy na ka bynta ka bha ka miat jong ki samla ka jylla.”, kren pynkut u Bah M H Dkhar.
