Shillong, Jymmang 09: Ka Seng, AJYWO Central Body, ka pynpaw ia ka jingpyrshah kaba jur ia ka Citizenship (Amendment) 2016 jong ka Sorkar Pdeng, Ka Bill ba mut ban kynthup jinglong trai ri ia ki kynhun rit paid na Bangladesh, Pakistan bad Afghistan kiba la wan shong shnong beaiñ lypa ha Ri India.
“Ngi pyrshah jur ia ka Citizenship (Amendment) 2016 jong ka Sorkar Pdeng, Ka Bill kaba mut ban pynkylla thymmai ia ka Citizenship Act 1955, khnang ba yn ioh pynrung jinglong trai ri ia ki rit paid Hindu, Sikh, Budhist, Jain, Parsi, bad Christian na Bangladesh, Pakistan bad Afghanistan kiba la shong shnong beaiñ lypa hapoh ka Ri India, halor ka nongrim ba kane ka Bill, kan sa ktah jur ia ka jaitbynriew rit paid jong ngi hapoh ka jylla hi baroh kawei, nalor ba ka lah ban long pyrshah ia ka Article 14 jong ka Riti Synshar, ka Ri India,” ong u Bah M H Dkhar, President jong ka AJYWO Central Body.
“Ka long pat kaba lyngngoh ruh ba ka sorkar India, tang ia ki trai ri trai muluk jong ka kam kam lah ban kdup bha bad ai ia ka hok kaba ki dei ban ioh kum ki nongshongshong tynrai ba pura jong ka Ri, mynta pat, ka kner pynban ia la ki kti sha ki nongwei, ki bym shym la dei hok shisha ban ioh ia ka hok kum ba dei ban ioh ki nongshongshnong trai ri trai kuluk jong jong ka Ri India,” ong shuh shuh u Bah Dkhar.
“Ka Seng AJYWO ka la ong ruh, “Ka jylla Meghalaya ka dei ka jylla kaba rit, ki trai ri trai muluk jong ka ki dei kiba rit paot bad kiba dang sah dien ha baroh ki liang. Ka jylla Meghalaya ka don mar shilliang bad ka ri Bangladesh, lada ka sorkar pdeng kan pass ia katei ka Bill, kan buh ia ka jingma kaba khraw ia ngi ki trai ri trai muluk rit paid jong ka jylla Meghalaya, nalor ba ka Jaidbynriew jong ngi, mynta, ka la don lypa ha u laiñ ka jingma.”
“Ngin jin da la kmen lada ka Sorkar Pdeng, kan thung ia ki Joint Parliament Committee ban leit jngoh hi da lade sha kylleng sawdong ki kyndong kynshrot jong ka Jylla Meghalaya bad ruh ban pynlong ia ki public hearing khnang ba ioh sngew bad tip lut ia ki jingeh kiba ki trai ri trai muluk rit paid ki ia kynduh bad ruh ban ioh sngew bad iohi hi da la ki jong ki khmat la ki trai ri trai muluk hangne, khamtam ki ba im ha ki kyndong kynshrot, la ki la ioh lut ne em ia ka hok ha ka jingiadei bad ka roi ka par kaba ki dei hok ban ioh kum ki nongshong shong tynrai ba pura bad ba dang sahdien jong ka Ri India,” la bynrap biang u Bah M.H Dkhar.
U kyrwoh u la ong ruh. “Ka AJYWO, ka iaroh ruh ia ka sorkar jylla hapoh ka jingialam u Conrad K Sangma, kum u Chief Minster, ba ka la shim ia ka rai ban pyrshah ia katei ka Bill jong ka Sorkar Pdeng. Ka Seng kan ieng ryngkat bad kiwei ki para sengbhalang bad ruh bad ka Sorkar Jylla ha ka ha kan ban pyrshah beit ia katei ka jingthmu jongka Sorkar Pdeng, haduh ba kan da weng syndon noh ia katei ka Bill”.
“Ka seng ka kyntu ruh ia ka Sorkar Jylla ban peitngor bad ruh ban lum jingtip la ki don ne em kiba kum kita ki jaidbynriew beaiñ, na Bangladesh, Afghanistan bad Pakistan hapoh jong ka Jylla bad lada ki don dei ban phah leit phai noh ia ki sha la ki jong ki ri namar ym tang ba ka long beaiñ ia ki ban shong ban sah hangne, hynrei ka buh ruh ia ka jaidbynriew jong ngi ha ka jingma,” ong biang u kyrwoh na ka seng.
“Ngi pyrshah jur ia ka Citizenship Amendment) 2016 jong ka Sorkar Pdeng na ka bynta ka iap ka im jong ka jaibynriew rit paid jong ngi bad ruh ngim kwah ba ka Jylla jong ngi lem bad kiwei pat ki jylla ha ka Ri India, khamtam ki jylla Shatei Lam-Mihngi, ba ngin dei tang kum ka dustbin” , kren pynkut u Bah M H Dkhar.
