Wapung, Risa
w, 08 : Ka Moopynieiñ Socio-Cultural & Sports Organisation (MSCSO) jong ka Dong Moopynieiñ, Wapungskur, East Jaintia Hills, ha u kyrwoh khubor ba la pyllait da u President jong ka u Bah Cheerful Ryngkhlem, ha ka sngi 7th u Risaw, 2017 ha ka por 1 baje noh phai sngi ha Moopynieiñ Playground, ka la pynhap pyrda noh ia ka jingialehkai football jong ka kaba ka la sdang naduh u bnai 5th tarik u Jylliew, 2017, ia kaba la tip kum ka “ 7th Cash Prize Football Tournament-2017”.
Ia kane ka football tournament, ka MSCSO ka shait pynlong man la u snem ha Moopynieiñ Playground, Dong Moopynieiñ, na ka bynta kyntiew bad ai mynsiem ia ki khun samla ba kin nang ioh mynsiem shuh shuh ban nang iai kiew shakhmat bad ruh ban ioh pyni ia ki sap ki phong jong ki ha ka kam ialehkai football.
Ha katei ka jingialang ba ishongkun, la pyniaid ia ka Closing Ceremony jong ka 7th Cash Prize Football Tournament-2017 da u Bah M H Dkhar, Finance Secretary jong ka MSCSO bad ruh la ia don u Bah Justine Dkhar, MLA, Parliamentary Secretary, ka sorkar Meghalaya kum u Kongsan bad u Bah Phasmon Dkhar, MDC, EM, JHADC kum u Symbud Kongsan lem bad u Bah Topass Lapasam, u wei na ki riew pawkhmat ka EJHD kum u Nongshahkot ba Kyrpang nalor u Bah Satly Ryngkhlem, Waheh Shnong ka Wapungskur bad kiwei kiwei ki riew pawkhmat bad ki kynrem ki lyndan.
U Bah Justine Dkhar, MLA haba ai jingkren ha katei ka sngi u la iaroh ia ka MSCSO kaba la lah ban pynlong ia kaba kum katei ka programme man la u snem na ka bynta ban kyntiew ia ka sap ka phong jong ki samla ha ki kam ialehkai football. U La kyntu ia ki samla ba kim dei ban duh jingkyrmen ha la ki sap ki phong ba ki don da kaba pynlut kai iaka por jong ki ha ki kam kai kiba ktah ia ka lawei jong ki bad ia ka imlang-sahlang hynrei ki dei ban trei shitom bad kut jingmut ban pynleit jingmut ha la ki jong ki sap ba ki don na ka bynta ka lawei jong ki khnang ba ha kawei ka sngi kin sa long ki khlur jong ka ri bad ka jaid bynriew la ha ki kam ialehkai ne kiwei kiwei ki kam ruh.
U Bah Phasmon Dkhar, MDC haba ai jingkren ha katei ka sngi, u la ong ba kum u wei na ki samla, kum u MDC u sngewthuh bha ia ki samla bad ia ki jingeh kiba ki shait ia kynduh bad ba barabor u shait pyrkhat kumno ban wan ki lad ki lynti ban saiñ dur ia ki ba kin sa long ki khlur jong ka Ri bad ka Jaidbynriew lada dei ha kino kino ki bynta ruh. Ha katei ka sngi la ioh ruh ia ka jingkren kyntu kynpham na u Bah Satly Ryngkhlem Waheh Shnong ka Wapungskur bad u Bah D.L Rymbai, u Adviser jong ka Dong Moopynieiñ.
La pynphuh pynphieng da ka jingiakhun phainal ba itynnad hadpeng artylli ki team, kata ka Iatyllilang FC ba dei trai da u Happy-I Rymbai bad ka Bhalang Mi-I FC jong u Sikairi Dkhar, ki ba la lah poi sha ka phainal napdeng ki 32 tylli kiba la iashim bynta ha katei ka tournament. Ha katei ka jingiakhun phainal ba itynnad, ia ka nam lahduh, Champion bad ka Trophy, ka Buskit Pisa kaba T. 16000/- tyngka, ki Medal bad ki Sertiphiket la rah noh da ka Iatyllilang FC jong u Happy-I Rymbai da kaba pynliem iaka Bhalang Mi-I FC, 3-0 bad pynlong ia ka kum ka Runner-up.
Ia ka nam kum u Nongialehkai ba Kynsai Tam , la rah da u Pynshai Lathong, katba ia ka nam kum u Nongap-kol baTbit Tam (Best Goal-keeper) la ioh khur da u Jemingson Ryngkhlem. Baroh ar ki dei na ka ka Iatyllilang FC jong u Happy-I Rymbai. La pynphuh pynphieng shuh shuh iakatei ka prokram da ki item ba la naduh ka shad, ka drill bad kiwei kiwei de na ki khun samla jong ka Moopynieiñ, ki khynnah skul ka KB Memorial S/S Wapung bad ka Wearring Memorial DCLP School, Wapung.
