Shillong, Naiwieng 15, 2022 : Ka surok ba itynnad baroh arliang na Shillong haduh Lum Mawthadraishan ka la sakhi ia ka jingshim bynta shitrhem jong ki nongniah cycle na kylleng ka jylla kiba ban shim bynta ha ka lympungbah jong ka 2nd North East Olympic Games 2022, ha kaba ka Manipur ka la ioh ban khur ia ka nam lahduh ha ka liang ki shynrang bad kumjuh ruh ha ka liang ki kynthei.
Da kaba beh ia ka thong kaba 80 kilometer, kane kadei kawei na ki 18 tylli ki jingialehkai ha ka NEOG 2022 kaba la pynlong shabar jong ka nongbah Shillong ha kaba ki nongniah cycle ki ioh ruh ia ka kabu ksiar ban iohi ia ki sawdong sawkun bad ki surok kiba bha naduh dang ngir ha kane ka sngi Ba-ar.
Ha ka jingiakhun, u Konthoujam Bishan Singh na Manipur u la ioh ban khur ia ka nam lahduh da kaba pyndep ia katei ka thong ha ki 2kynta, 28 minit bad 25 sekhon ban khur ia ka jingjop ha ka liang ki shynrang (Open men’s category).
Ia ka takma rupa pat la ioh da u Tajum Dere na Arunachal Pradesh uba poi slem tang hadien shi minit kata ha ki 2.29:19 sekhon katba u Kevinjohn Khyllait jong ka Meghalaya pat u la ioh ban khur ia ka takma rnong da kaba pyndep ha ki 2:30:45 sekhon.
Ha ka thup iakhun jong ki kynthei pat, ia ka nam lahduh la ioh ban khur ia ka Naorem B Devi jong ka Manipur kaba la pyndep ia ka thong ha ki 2:57:18 sekhon.
Katba ia ka kyrdan kaba ar la ioh da ka Arunachal Pradesh lyngba ka Lindum Kia Kia kaba pyndep ha ki 3:01:56 sekhon bad ka Thokchom Helen Devi ka la ioh ban pynbun takma ia ka Manipur da kaba wan ha ka kyrdan kaba lai hadien ba ka la pyndep ia ka thong ha ki 3:04:55 sekhon.
