Shillong, Nohpra
h, 08: Ka jingiakhih shah thngan ki dkhot ka seng HYC kala poi sha ka sngi kaba ar mynta kasngi. Ki pulit ha dien ba kila rah ia ki dkhot ka seng na additional secretariat sha Mawngap, na Mawngap kila rah bad leit buh ia ki sha ophis ka seng sha Mawlai Nongkwar.
Ha pdeng kane ka jingshah rah ki dkhot ka seng kila beteng ia ka jingshah thngan jong ki da kaba sah miet ha ophis ka seng bad mynta ka sngi kila lieit tur ban sha thngan ha khmat iing jong u myntri rangbah ka jylla ha Polo hynrei ha kane ka jaka ruh kim shym la ioh lad namar la rah noh da ki pulit ia ki na katei ka jaka.
Na khmat iing sah jong u myntri rangbah ki pulit kila rah ia ki sha Sardar Police station bad buh ia ki hapoh jong ka Hall kaba don ha kane ka police station kaba ki juh pynlong ia ki jingialang na ka por sha ka por, hynrei mynta ka noh phai sngi la rah ia ki dkhot jong ka seng HYC sha Civil Hospital Shillong.
Na ka liang jong ki nongialam jong ka seng HYC kila ong ba kin beteng ia kane ka jingshah thngan ka jong ki ban dawa ia ka sorkar ba ka dei ban ia kren hapoh ka iing dorbar thawain kala la sdang mynta ka sngi ban pyntrei kam ia ka ILP ha kane ka jylla ban ia da na ka jingwan tuid kyrthep jong ki briew ba na bar sha kane ka jylla.
Katkum ka jingthmu jong ka seng HYC, ka long ba kane ka jingshah thngan kan long lai sngi lynter, naduh ka 7 tarik haduh ka 9 tarik la shai ka sngi kan kut. Na ka liang jong ki bor ba dei peit ia ka District administration kila ai lad tang ha ka 7 tarik kata ruh haduh ka por saw baje, mynta ka sngi kim shym la ailad namar kala sdang ka jingiashong dorbar tlang. Kane ka jingshah thgnan kan kut la shai ka sngi.
