Shillong, Nohprah 07: Ka kynhun ki seng bhalang na ki lum khasi ha ka lama jong ka Confederation of Hynniewtrep Social Organization (COHSO) mynta ka sngi kala pynlong ia ka jingiaid paidbah da kaba rah lamaiong ba pynpaw ia ka jingpyrshah halor ka jingthmu jong ka sorkar pdeng ban wanrah ia ka Citizenship (Amendment) Bill 2016.
Ia kane ka jingiaid paidbah la sdang na Malki na jaka ba don u durmot jong u bah Bull N Lyngdoh president ba rim ka KSU ba la bam kwai ha dwar u blei bad ia kane ka jingiaid paidbah la pynkut ha additional secretariat parking lot. Ha kane ka sngi da ki spah ngut ki dkhot jong ki seng bapher bapher ki la wan ban ia shim bynta.
Shuwa ban sdang ia kane ka jingiaid paidbah u Sharman jong ka COHSO u Bah Robertjune Kharjahrin, ha ka jingkren jong u la ong ba kaei kaba la pynlong ia ki 14 tylli ki seng bhalang ban pyrshah ia ka Citizenship (Amendment) Bill 2016 bad kila dep ban ai ruh da ka jingthoh sha ka Joint Parliamentary Committee.
Kane ka Bill ka long kaba ma bha namar ka long da kane ka Bill lah ban wanrah ia ki briew na Bangladesh kiba wan na Bangladesh. U la ong ba ka niam kam dei kaba neh, mynta u briew u lah ban don ha kawei ka niam bad un kylla sha kawei ruh ka niam bad lada kane ka bill ka long ain kane kan dei ka khlam na ka bynta ka jaid bynriew.
Kum ka seng ka kyntu ia ki nongmih khmat sha ka iing dorbar ka long ban kin pyrshah ia kane ka Bill, na ka liang jong u Bah Robert u la ong ba kane ka jingleh ka dei ka kam buit poh jong ka BJP ban wanrah ia ki khar Bangladesh sha North East ba kin long ki nongthep but na ka bynta ka BJP.
Na ka liang jong ki seng bhalang kid a pyrshah jur ia kane ka jingleh jong ka BJP namar kane ka long ka khlam na ka bynta ki paidbah ka North East baroh kawei, lada ki briew na Bangladesh kito ki Hindu, ki Sikh, ki Jain, ki Khristan ki wan na Bangladesh ka North East kala shah tyllep ha kine ki briew bad ka BJP kan pyndon kam ia ki ban ioh but.
