Shillong, Rymphang 16: Mynta ka sngi ki saw tylli ki seng bhalang jong ka West Khasi Hills District, ka HYC, HANM, WYF bad ka WKSU, kala rah lama iong ha ka por ba u Bah Prestone Tynsong myntri symbut rangbah ka jylla u dang kren ha ka por kanbas ilekshon MDC ha Iew Nongstoin.
Kane ka jingleit jong u bah Prestone Tynsong sha Nongstoin mynta ka sngi ka long ban leit kanbas na ka bynta u kyrtong ka party NPP na Nongstoin Konstitwensi, katba ka jingialang ka dang iaid bad kiwei ki nongkren ki la kren ha khmat kam shym don kano kano ka jingiarah lama iong.
Hynrei ha mar ka por ba u Bah Prestone Tynsong myntri symbut rangbah u la ieng ban kren kila mih kynsan ki la ma iong hakhmat jong ki paidbah bad kane ka jingrah ia ki lama iong ka beteng haduh ban da dep ban kren u Bah Prestone bad ha dien ba u la dep ban kren kitei ki saw seng ruh kila ia mih noh kane ka jaka ba long kane ka jingialang paidbah na station kali Nongstoin.
Katkum ka jingtip kaba la lah ban ioh la ong ba kane ka jingrah ia ki lama iong da kitei ki saw seng ka long ba ki pynpaw pyrshah ia ka jingjia ha shnong Umsawli ha Langpih ha kaba ki paidbah kila shah bom pathar ha ki pulit jong ka jylla Assam ha kaba bun kila mynsaw.
Ha ki jingthoh kaba kila thoh da kine ki saw tylli ki seng kila dawa ba ka sorkar ka dei ban shim khia ban pynbeit noh ia u pud u sam hapdeng kine ki ar tylli ki jylla kaba la neh mynta la bun bun snem khlem da lah shuh ban ia pynbeit.
