Shillong, Naiwieng 13: Ki pulit jong ka East Garo Hills mynta ka sngi ha ka por 8.30 baje mynstep kila ioh ia ka jingtip ba ki riew runar kila rahbor ia u Tapos Maji ba dang 37 snem ka rta u ba dei u nongkhaii syieng na Krishnai Goalpara Assam.
Katkum ka khubor kaba ki pulit kila ioh la ong ba ki briew kiba rah bor ia u Tapos ki don hapdeng san bad hynreiw ngut tang u wei na pdeng kine u don ia ka pistol ha kane ka por ba ki tap ia ka dur khmat ka jong ki.
Kine ki nongrah bor kila rah ia u na Bansam Awe ban leit sha Rongsak kaba hap hapoh jong ka Chiading Police station. Mar ia ioh ia kane ka jingtip ki pulit kila leit bran bran sha ktei ka jaka ban kynra ia ki jaka sawdong na ka bynta ban ioh ban pynlait ia u ba shah rah bor.
