Shillong, Nailar 19: Ka seng ki nonghikai ia kaba la tip kum ka All Meghalaya SSA School Teachers Association (AMSSASTA) ha ka sngi saitjain kala pynbna paidbah ba kila shim iaka rai ban buh teng shuwa ia ka jingthmu ban ia khih da kaba shong kyllain mungor ha ka 21 tarik mynta u bnai ia kaba la buh ban long hapoh kane ka nongbah Shillong.
Ka jingthmu ka jong ki ban ia khih ka long halor ka jingbym pat ioh ia ka tulop jong ki mynta la saw bnai. Haba kren ha ki lad pathai khubor ha Shillong Press Club u bah Lasforious Marngar presidentjong ka seng AMSSASTA, u la ong ba ia ka rai ban pynlong ia ka jingiakhih la shim namar ba kim shym pat ioh ia ka tulop jong ki naduh u bnai Iaiong haduh Naitung bad kila dep ban dawa na ka sorkar ba ka dei ban pynlait ia ka tulop hapoh ka 20 tarik mynta u bnai.
Haba ia dei bad kane kila dep ban ai ia ka dorkhas sha u myntri rangbah ka jylla bad ha ka juh ka por ia ka tulop kaba ki dei ban ioh na ka T. 20, 493 ha ki UP Skul la pynhiar sha ka T.20, 000 bad ia ki LP skul na ka T. 19,943 sha ka T.15, 000. Hynrei ha ka jingiakren bad u myntri rangbah, ka jubab kaba la ai ka long ba ia ka pisa kaba duna ym bei da ka sorkar jylla ba ka tulop kan neh kum juh.
Ha ka jingiakynduh na ka liang jong u myntri rangbah u la kyntu ia ki nonghikai ba kin iai ap haduh ban da kut une u bnai ban pynlait ia ka tulop ka jong ki. Halor kane ka jingkular jong u myntri rangbah kila shim ia ka rai ban buh teng shuwa ia ka jingiakhih, hynrei lada ka sorkar kam leh ia kaba la ia kut ki nonghikai kim banse ban iakhih.
